Ulttyq komıssııa óńirlerdegi áıelderdiń máselesin sheshýge basa nazar aýdaryp otyr
«Ótken jyl ulttyq komıssııa úshin sapaly ózgeristermen, jumystyń transformatsııalanýymen erekshelendi. Komıssııa quramy jańardy. Biz ulttyq komıssııanyń jaýapkershilik aımaǵyna kiretin máselelerdi sheshý úshin shoǵyrlandyrýdy jáne azamattyq qoǵamdy tereńirek tartýdy maqsat ettik. Barlyq baǵyttar boıynsha jumys bıyl da kúsheıtiledi. Óńirlerge erekshe nazar aýdarylatyn bolady. Osy turǵyda birqatar áleýmettik mańyzy bar jobalar «Samuryq-Qazyna» AQ-men birge iske asady», - dep atap ótti otyrysta Ulttyq komıssııa tóraǵasy, QR Prezıdenti Ákimshiligi Basshysynyń orynbasary Aıda Balaeva.
Ulttyq komıssııa tóraǵasynyń orynbasary Lázzat Súleımen 2022 jyldyń negizgi qorytyndylary týraly sóz sóıledi.
Ulttyq komıssııany jańǵyrtý qyzmeti barlyq baǵyttary boıynsha serpin bergen: áleýmettik-demografııalyq damý; áıelderdiń ekonomıkalyq jáne saıası múmkindikterin keńeıtý; balalardyń qaýipsizdigin, quqyqtary men zańdy múddelerin qamtamasyz etý; genderlik saıasat jáne halyqaralyq yntymaqtastyq.
Ulttyq komıssııanyń saraptamalyq-taldaý fýnktsııalarynyń blogy kúsheıtildi.
Problemalardy keshendi taldaý, óńirlik erekshelikterdi baǵalaý jáne otyrystarǵa sheshimder ázirleý úshin komıssııa músheleriniń óńirlerge sarapshylarmen birlesip shyǵý tájirıbesi engizildi.
Bir jyl ishinde Ulttyq komıssııa úılestiretin qurylymdar nyǵaıtyldy.
Atap aıtqanda, óńirlerde balalar quqyqtary jónindegi ýákilderdiń laýazymdary engizildi, otbasyn qoldaý ortalyqtary ashyldy.
Prezıdenttiń memleket qatysatyn kompanııalardaǵy basshylyq laýazymdaryna áıelderdiń 30% ókildigi týraly tapsyrmasy sheńberinde normatıvtik-quqyqtyq aktilerge ózgerister engizildi.
Otbasylyq-genderlik máselelermen aınalysatyn 500-ge jýyq ÚEU-yn qamtıtyn seriktestik jelimen syndarly dıalog ornady.
Tsıfrlandyrý salasynda áıelderdiń múmkindikterin damytý máseleleri qamtamasyz etildi.
«Technowomen» qaýymdastyǵymen jáne «BTS Education» kompanııasymen birlesip elektrondyq kommertsııa mektebi ashyldy jáne halyqaralyq jáne qazaqstandyq elektrondyq alańdarda satýdy oqytý boıynsha qazaqstandyq qolónershilerge 1400 tegin kýrs ótkizildi.
Ana men bala ólimi, kámeletke tolmaǵandar arasyndaǵy sýıtsıd boıynsha qabyldanyp jatqan aldyn alý sharalarynyń nátıjesinde osy salalardaǵy jaǵdaıdy turaqtandyrýǵa qol jetkizildi.
2022 jyldyń qorytyndysy boıynsha ana ólimi kórsetkishiniń 2,6 ese, sábı ólimi kórsetkishiniń 3% tómendegeni baıqalady.
Kámeletke tolmaǵandar arasyndaǵy sýıtsıd sany 2022 jyly 11%-ǵa, sýıtsıdke áreket etý 17%-ǵa azaıdy.
Halyqaralyq uıymdarmen, eń aldymen BUU, Eýropa jáne Ortalyq Azııa elderiniń qurylymdarymen jemisti ózara is-qımyl jasaldy.
Óńirlik komıssııalardyń qyzmetine monıtorıng júrgizý nátıjeleri boıynsha Ulttyq komıssııa tóraǵasynyń orynbasary Elena Tarasenko sóz sóıledi.
«Jańǵyrtý nátıjesinde óńirlik komıssııalardyń quramyndaǵy azamattyq qoǵam ókildigi 40%-dan 60%-ǵa deıin jańartyldy. Bul halyqtyń maqsatty toptarymen jumys isteıtin qoǵamdyq pikir kóshbasshylary, bıznes-qaýymdastyqtardyń ókilderi», - dep atap ótti Ulttyq komıssııa tóraǵasy.
Ulttyq komıssııa basshysy Aqparat jáne qoǵamdyq damý mınıstrligine, ákimdikterge tapsyrma bere otyryp:
«Memlekettik áleýmettik tapsyrys arqyly otbasylyq jáne genderlik saıasat jobalaryna qarajatty durys bólý boıynsha maqsatty jumysty qamtamasyz etý qajet. Balalardyń qaýipsizdigine, turmystyq zorlyq-zombylyqtyń aldyn alýǵa, aýyl áıelderiniń ekonomıkalyq múmkindikterin keńeıtýge qatysty máselelerdi sheshý boıynsha jobalardy qoldaý qajet. Qarajatty tıimdi jumsaý máselesi únemi baqylaýda bolýy kerek», - dep atap ótti.
Ulttyq komıssııanyń otyrysyna sarapshylar qoǵamdastyǵynyń ókilderi, óńirler ákimderiniń orynbasarlary, ortalyq memlekettik organdardyń basshylary qatysty.
Otyrys sońynda Ulttyq komıssııa tóraǵasy A. Balaeva memlekettik organdarǵa birqatar tapsyrmalar berdi.