Ulttyq qoǵamdyq senim keńesiniń músheleri Eńbek mınıstrimen kezdesti
QR Prezıdenti janyndaǵy Ulttyq Qoǵamdyq Senim Keńesiniń (UQSK) músheleri onlaın rejıminde Qazaqstan Respýblıkasy Eńbek jáne halyqty áleýmettik qorǵaý mınıstri Birjan Nurymbetovpen áleýmettik saıasattyń ózekti máselelerin talqylady.
Jumys otyrysyna áleýmettanýshy, «Strategııa» áleýmettik-saıası zertteýler ortalyǵy» QQ dırektory Gúlmıra Іleýova, Qazaqstandaǵy BUU Damý baǵdarlamasynyń jetekshisi Arman Qashqynbekov, «Talap» qoldanbaly zertteýler ortalyǵynyń prezıdenti, «Nur Otan» partııasy Saıası keńesiniń múshesi Rahym Oshaqbaev, saıasattanýshy, BTS Digital ǵylymı jobasynyń jetekshisi Saıasat Nurbek, áleýmettik kásipker Emın Askerov, Eýropalyq quqyq jáne adam quqyǵy saraptamalyq ınstıtýtynyń dırektory Marat Báshimov, jýrnalıst Maksım Rojın, qoǵam qaıratkeri, saıasattanýshy Aıdos Sarym, «Akselerator dobra» respýblıkalyq eriktiler qozǵalysynyń jetekshisi, zańger Aınur Sábıtova, jýrnalıst jáne qoǵam qaıratkeri Lıazzat Kojahmet qatysty.
UQSK hatshysy Erlan Karın atap ótkendeı, bul keńes músheleriniń mınıstrlermen besinshi kezdesýi. Densaýlyq saqtaý mınıstri Alekseı Tsoı, Tsıfrlyq damý mınıstri Baǵdat Mýsın, Bilim jáne ǵylym mınıstri Ashat Aımaǵambetov jáne Ekologııa, geologııa jáne tabıǵı resýrstar mınıstri Maǵzum Mırzaǵalıev Ulttyq senim keńesi múshelerimen júzdesken.
Basqosýǵa qatysýshylar mınıstrge qazirgi tańdaǵy ózekti saýaldardy qoıyp, jan-jaqty jaýaptaryn aldy. Saıasattanýshy, BTS Digital bilim berý jobasynyń jetekshisi Saıasat Nurbek elimizde qyzmetkerlerdiń erkin ýaqytta jáne qashyqtyqtan jumys isteýine arnalǵan zańnamalyq shekteýler bar áli saqtalyp turǵanyn atap ótti.
«Bul - retteý sharalaryn qajet etetin sharýa, óıtkeni karantınge qatysty jaǵdaı jáne onyń saldary uzaqqa sozylatyn sııaqty», - dedi Nurbek.
«Talap» qoldanbaly zertteýler ortalyǵynyń dırektory Rahym Oshaqbaev turǵyndarǵa zeınetaqy qarajatyn tek baspana máselesin sheshýge ǵana emes, ózderi nemese balalarynyń bilim alýyna jumsaýyna múmkindik berý týraly usynys jasady.
«Prezıdent alǵashynda bilim alýǵa jumsaý týraly aıtty, biraq biz ony jumys tobynda talqylaǵan kezde kópshilik búginde Qazaqstanda bilim alýǵa qajetti quraldar jetkilikti degen toqtamǵa keldi. Olar odan góri aqysy qymbatqa túsetin emdeý sharalaryna bólý joldaryn qarastyrýdy jón kórdi. Qazir zań jobasy Parlament qaraýynda jatyr. Biz Eńbek jáne áleýmettik qorǵaý mınıstrliginde bilim alýdyń jeńil joldary bar degen sheshimge keldik - eger biz qandaı da bir azamatqa zeınetaqy qarajatynyń belgili bir mólsherin alýǵa múmkindik bersek, eger ol ony bilim alýǵa jumsasa, onda turǵan eshteńe joq. Eger siz UQSK múshesi retinde qoldaý kórsetseńiz, depýtattar da osyndaı pikirde bolsa, muny Parlamentte sheshýge bolady», - dep jaýap berdi Nurymbetov.
«Akselerator dobra» respýblıkalyq eriktiler qozǵalysynyń jetekshisi Aınur Sábıtova mınıstrge erikti bolǵan jastarǵa tıimdi paıyzben nesıe berýdi qarastyrýdy usyndy.
Otyrystyń sońynda kezdesý barysynda aıtylǵan usynystardy mınıstrlik qabyldaıtyndyǵy aıtyldy. Óz kezeginde, Eńbek jáne halyqty áleýmettik qorǵaý mınıstri B.Nurymbetov birqatar máselelerdi pysyqtaýǵa vedomstvo janyndaǵy jumys tobyna UQSK múshelerin de shaqyrdy.
Sonymen qatar, 24 qyrkúıek kúni keńes músheleri Aýyl sharýashylyǵy mınıstrimen kezdesý ótkizýdi josparlap otyrǵany belgili boldy.
Aıta keteıik, UQSK 2019 jyly Qazaqstan Respýblıkasy Prezıdentiniń Jarlyǵymen qurylǵan, Keńestiń tórtinshi otyrysy 6 qazan kúni ótedi. UQSK qyzmeti týraly aqparat Facebook pen Telegram .-daǵy resmı paraqshasynda jarııalanady.