Ulttyq qoǵamdyq senim keńesine BAQ ókilderi kirýi tıis - Memleket basshysy

NUR-SULTAN. QazAqparat - Ulttyq qoǵamdyq senim keńesine BAQ ókilderi kirýi tıis. Bul týraly búgin Aqordada BAQ ókilderine QR Prezıdentiniń syılyqtary men granttaryn tabystaý rásiminde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Saılaýaldy tuǵyrnamamda saıası júıeni transformatsııalaý mindetin qoıǵan edim. Onyń negizi - memlekettik organdar qyzmetiniń ashyqtyǵy, jalpyulttyq mindetterdi sheshýde BAQ men memlekettik organdardyń syndarly ózara is-qımylyn nyǵaıtý. Men barlyq deńgeıdegi memlekettik organdardyń basshylaryna onlaın-qabyldaýlar, jeke blogtar ashýǵa tapsyrma berdim. Ulttyq qoǵamdyq senim keńesin qurýǵa bastamashylyq jasadym. Qazirgi ýaqytta onyń quramyna qatysty keńes júrip jatyr. BAQ ókilderi de keńes quramyna kirýi tıis dep sanaımyn», - dedi Memleket basshysy.

Qazaqstan Prezıdenti áleýmettik-saıası ózgeristerdiń qarqyndy ózgeriske ushyraýy jaǵdaıynda jýrnalıster qoǵamdastyǵynyń memleket pen qoǵam ómirindegi róli aıtarlyqtaı arta túsetindigin basa aıtty. Otandyq medıaqoǵamdastyqtyń durys shoǵyrlanýy, jýrnalısterdiń jaýapkershilikke toly azamattyq ustanymy, olardyń shynaıylyǵy aqparattyq keńistiktiń tabysty jumys isteýiniń negizi ekendigin atap ótti.

«Memleket óz tarapynan BAQ-qa qoldaýyn jalǵastyra beretin bolady», - dedi Q.Toqaev.