Ulttyq qoǵamdyq senim keńesi der kezinde quryldy - Lıma Dıas

NUR-SULTAN. QazAqparat - Ulttyq qoǵamdyq senim keńesi kóp qyzmet atqarýy tıis. «Amanat» azamattyq platformasynyń ákimshisi Lıma Dıas osyndaı pikir bildirdi, dep habarlaıdy «QazAqparat» HAA tilshisi.

«Qazir qoǵamda keıde bir-birimen yntymaǵy jarasyp, keıde arasy alshaqtap ketetin toptar týraly pikirler aıtylyp júr. Menińshe, qoǵamnyń suranysyna jaýap retinde Ulttyq qoǵamdyq senim keńesi der kezinde quryldy. «Senim keńesi» degenniń ózi qazirde Qazaqstan úshin asa mańyzdy. Bul - eń aldymen memleketke, kez kelgen jańa bastamalarǵa degen senim. Dıalog formasy - osy senimdi týdyratyn birden-bir durys forma. Dıalog - ózgeniń pikirin qurmetteý, dıalog - qarama-qaıshy pikirlerdi qabyldaý. Óıtkeni, ókinishke qaraı, qazirgi azamattyq qoǵam belsendileriniń barlyǵy da ózgeni tyńdaı bilmeıdi. Óz pikirin birden-bir durys pikir dep sanaıdy. Azamattardyń bir-birin túsinýi men syılastyǵy ýaqyt óte qalyptasatyn jaıt, menińshe, joǵary deńgeıdegi osyndaı alańdar azamattardyń syılastyǵyn damytýǵa septigin tıgizedi», - dedi L.Dıas.

Onyń aıtýynsha, endigide Ulttyq keńestiń quramy sapaly bolýyn, halyqtyń barlyq býynyn qamtýyn qadaǵalaý qajet. Sonda ǵana Keńes durys qyzmet júrgizip, naqty máselelerdi qozǵaı alady, ıdeıalardy usynady.

Avtor: Meırambek Baıǵarın