Ulttyq kitaphanada 95 myńnan astam kitap tsıfrlyq formatqa kóshirildi
«Avtorlyq quqyq máselesi kitaphana jumysyna da qatysty. Ulttyq kitap qoryn saqtaý jáne basylymdardy barynsha qoljetimdi etý – ulttyq kitaphana men respýblıka kitaphanalarynyń basym baǵytynyń biri. Kitap qoryn saqtaýdyń bir joly – baspa basylymdaryn tsıfrlyq formatqa kóshirý. Osyǵan oraı, «Tsıfrly Qazaqstan» memlekettik baǵdarlamasy aıasynda kitaphanada elektrondy kitaphanalardy qalyptastyrý úshin kitap qoryn aýqymdy tsıfrlandyrý jumysy júrgizilip jatyr», - dedi QR Ulttyq kitaphana dırektory Baqytjamal Ospanova.
Búgingi tańda 95 myńnan astam otandyq basylym tsıfrlyq formatqa kóshirildi. Elektrondy kitaphanada ulttyq kitaphananyń 20 myń qujaty bar.
Baqytjamal Ospanovanyń aıtýynsha, QR qoldanystaǵy avtorlyq quqyq týraly zańynyń normalary oqyrmanǵa zamanaýı avtorlardyń shyǵarmalaryn tsıfrlyq formatta tolyq oqýǵa múmkindik bermeı otyr.
«Kitaphana qyzmetine ár kitapty tsıfrlandyrý úshin avtordyń nemese avtorlyq quqyq ıelenýshiniń jazbasha ruqsatyn talap etetin uıymdastyrýshylyq-quqyqtyq jáne qarjylyq sıpattaǵy qosalqy jumystary kedergi keltirýde. Shyǵarmalardy sandyq túrge aýdarýǵa avtordyń kelisiminsiz ol qaıtys bolǵannan keıin 70 jyldan keıin ǵana ruqsat etiledi. Ol ýaqytta bul mańyzdy bolmaı qalýy múmkin. Bir jaǵynan, kitaphanalar shyǵarma avtorlarynyń quqyqtaryn qurmetteýge, ekinshi jaǵynan, olardyń eńbegin paıdalanýshylardyń bilim berý, aǵartý jáne ǵylymı qyzmetine keńinen paıdalanýyn qamtamasyz etýge mindetti. Búgingi tańda biz avtorlarmen 700-ge jýyq kelisim-shart jasadyq. Bizdiń oıymyzsha, avtorlyq quqyqty qorǵaý salasyndaǵy ulttyq zańnamada áli de bolsa kitaphanalardyń tsıfrlyq ortadaǵy mańyzdy jáne qoǵamdyq aqparatqa qoljetimdilik ortalyqtary retindegi quqyqtaryn kózdeıtin arnaıy bap bolýy kerek. Óıtkeni, Belarýs elinde osyndaı zań qabyldanǵan», - dedi ol.
Óz kezeginde QR Ádilet mınıstrliginiń zııatkerlik menshik quqyǵy departamentiniń dırektory Ermek Altynbekov 2 maýsym kúni zııatkerlik menshik týraly zań qabyldanǵanyn jetkizdi.
«Biz bul zańdy eki jyl talqyladyq. Májiliste 27 jumys toby, Senatta 6 komıtet boldy. Májiliste zań jurtshylyqpen, avtorlyq uıymdar men múddeli memlekettik organdardyń ókilderimen talqylandy. Zań zııatkerlik menshik quqyqtaryn jáne ónerkásiptik menshik obektilerin qorǵaýdy kúsheıtý sharalaryn qarastyrady. Sondaı-aq ulttyq zańnama zııatkerlik menshik quqyqtaryn qorǵaý salasyndaǵy halyqaralyq normalar men tájirıbelerdiń erejelerine sáıkestendirildi», - dedi Ermek Altynbekov.
Sonymen qatar, sharaǵa jınalǵandar zııatkerlik menshik quqyqtaryn is júzinde qoldaný, shyǵarmashylyq qyzmet nátıjelerin jasaý men paıdalanýdy quqyqtyq retteý, sondaı-aq olardyń ekonomıkamen, aqparattyq qoǵammen ózara árekettesýi, tsıfrlandyrý, sáýlet, baspa isi jáne taǵy basqa taqyryptar boıynsha aýqymdy máselelerdi qozǵady.
Aıta keteıik, konferentsııaǵa kompozıtorlar, oryndaýshylar, fotograftar, jýrnalıster, kınorejısserlar, prodıýserler, baspagerler, avtorlyq quqyq ıeleri, Qazaqstannyń bıznes ókilderi qatysty.