Ulttyq kınony qoldaý ortalyǵy neshe jobany júzege asyrdy

NUR-SULTAN. QazAqparat – Bıyl Memlekettik ulttyq kınony qoldaý ortalyǵy 62 jobaǵa qoldaý kórsetip otyr. Bul týraly Májilistiń jalpy otyrysynda QR Mádenıet jáne sport mınıstri Dáýren Abaev aıtty, dep habarlaıdy QazAqparat tilshisi.

«2019 jyly alǵash ret Qazaqstan Respýblıkasynyń «Kınomatografııa týraly» Zańy qabyldanǵan bolatyn. Bul otandyq kınonyń sapasyn arttyryp, básekege qabilettilikti jańa deńgeıge kóterýge, júıeli jaǵdaı jasaýǵa múmkindik berdi.

Osyǵan oraı Memlekettik ulttyq kınony qoldaý ortalyǵy quryldy. Atalǵan ortalyq ulttyq kıno óndirisi, prokaty, kórsetilýi men nasıhattalýyna bıýdjettik jáne bıýdjetten tys qarajatty bólýmen aınalysady. Bıyldyń ózinde Ortalyq 62 jobaǵa qoldaý kórsetip, onyń ishinde 18 tolyq metrajdy kórkem fılm, 19 derekti, 17 qysqa metrajdy jáne 8 anımatsııalyq fılmniń jaryqqa shyǵýyna jol ashyp otyr», - dedi Dáýren Abaev.

Onyń aıtýynsha, qarjylandyrý týraly sheshim Saraptama komıssııasynyń qorytyndysy negizinde qabyldanady. Atalǵan komıssııanyń quramyna kınomatografııa qaýymdastyǵynyń bedeldi músheleri kiredi.

«Sonymen qatar, qoldanystaǵy zańnamamen Qazaqstanda fılmder túsiretin sheteldik kınostýdııalarǵa sýbsıdııalardy jartylaı qaıtarý qarastyrylady. Bul jerde rıbeıt týraly sóz etip otyrǵanymyzdy aıta ketken jón»,- dedi mınıstr.