Ulttyq keńes usynysy: ÚEU músheleri úshin ár mekemede arnaıy kópfýnktsıonaldy keńistik qurý kerek

NUR-SULTAN. QazAqparat – «Almaty Management University» prezıdenti, qoǵam qaıratkeri Asylbek Qojahmetov memlekettik organdar halyqqa qyzmet etýi kerek degen qaǵıda oryndalmaı kele jatqanyn másele etip kóterdi, dep habarlaıdy QazAqparat tilshisi.

«Elimizde memlekettik organdar keńselerine azamattardyń qol jetimdiligi narazylyq týdyrady. «Halyqtyń memlekettik keńselerge emes, memlekettik keńselerdiń halyqqa qyzmet etýi kerek» degen qaǵıda oryndalmaı keledi. Memlekettik organdardyń azamattarǵa aıqara ashylǵan esigin kórý múmkin emes. Sondyqtan, sátti tájirıebelerdi qoldanyp, ár memorganda kezdesýler men kópshilik is-sharalardy ótkizý úshin Úkimettik emes uıymdar ókilderine ruqsat qujattarynsyz, shekteý jasalmaı, uıaly telefondarymen kire alatyn ár mekemeniń birinshi qabatynda arnaıy kópfýnktsıonaldy keńistik qurý jóninde usynys jasaımyn», - dedi Asylbek Qojahmetov elordadaǵy Ulttyq qoǵamdyq senim keńesiniń alǵashqy otyrysynda.

Eske sala ketsek, elordada Qazaqstan Prezıdenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy ótip jatyr.

«Qazaqstan Prezıdenttik basqarý formasyndaǵy memleket retinde qalýy kerektigine senimdimin. Alaıda Parlament saıası júıedegi laıyqty ornyn alýy qajet», - dedi jıynda Prezıdent. Sondaı-aq, Memleket basshysy Qazaqstanda saıası reformalar qajettiligi pisip-jetilgenin málim etti.