Ulttyq keńes múshesi: Ákim saılaýy – majorıtarlyq saıası júıe qurýdyń alǵashqy qadamy

NUR-SULTAN. QazAqparat – Aýyl ákimderiniń saılaýy eshbir stsenarıge baǵynbaıtyn, erkin formatta ótti. Ulttyq qoǵamdyq senim keńesiniń múshesi Aleksandr Danılov 730 eldi mekenniń ákimin anyqtaǵan saıası naýqanǵa osyndaı baǵa berip otyr. dep habarlaıdy QazAqparat tilshisi.

«Saılaý is júzinde sátti ótti. Óıtkeni basty nátıje - daýys berýshilerdiń belsendiligi joǵary boldy. Qorytyndyny qarasaq, barlyq jerde jeńisi boljanǵan úmitkerlerdiń joly bola bermegen. «Bárine qarsymyn» degen baǵandy belgileý arqyly, úmitkerlerdiń eshbirine kóńili tolmaıtynyn kórsetkender boldy. Endi bir jerde ózin-ózi usynǵandardyń joly bolyp jatty. ıAǵnı halyq sondaǵy eldiń ýaıymy men múddesin jaqsy biletin adamdarǵa basymdyq berdi. Osylaısha turǵyndarǵa óz qalaýyn oryndap, paıymyn bildirýge tolyq jaǵdaı jasaldy. Bul saılaý – kandıdattardyń bári ózderin usyný arqyly saılanatyn majorıtarlyq saıası júıeni qurýdyń alǵashqy qadamy», - deıdi sarapshy.

Aleksandr Danılov keshegi saılaýdan birneshe qorytyndy shyǵarǵan.

«Birinshiden, partııalarǵa budan bylaı belsendi bolý kerek. Olar endi saılaýlar arasynda burynǵydaı qalyń uıqyǵa kete almaıdy. Jyl saıyn, toqsan saıyn kúresip, kandıdattardy baqylap, aımaqtarda yqpalyn arttyrý kerek. Bul satydaǵy saılaý turaqty túrde ótkiziledi jáne ár jyl saıyn deńgeıi óse beredi. 2024 jyly biz aýdan ákimderin saılaýǵa kóshemiz. Búgin saılanǵandar aýyl ákimderiniń ishinen sol kezde aýdan ákimdigine úmitkerler shyǵýy múmkin. Osylaısha taza eńbektiń arqasynda áleýetin kórsetip, saıası mansabyn qura alady. Qalaı desek te, el saılaǵan ákim joǵarydan taǵaıyndalǵan ákimnen ózgeshe bolady. Oǵan únemi el aldynda ár qadamy úshin esep berip, bıýdjetti qalaı durys jumsaıtynyn túsindirip otyrý kerek. Osylaısha biz saıası júıeni sapaly etemiz. Daýys berý kezinde zań buzý az bolǵanyna qýandym», - deıdi Ulttyq keńes múshesi.

Onyń paıymynsha, saılanǵan ákimder isten góri sózge áýes bolsa, óz oryndaryn uzaq saqtap tura almaıdy.

«Aýyldaǵy halyqtyń qalalyqtarǵa qaraǵanda saılaýǵa belsendi qatysatynyn túsiný kerek. Adamdar bul joly sonaý ortalyqtaǵy bılik ókilderin emes, ózderiniń kóz aldyndaǵy bılikti tańdady. Onymen kúnde sóılesip, suraq qoıa alady. Bir sózben aıtqanda adamdar naqty problemalardyń sheshilý jolyna daýys berdi, óz aýylynyń, aýyldyq okrýginiń bolashaǵyn tańdady. Sondyqtan saılaýshylardyń belsendi bolatyn jóni bar. Bul nátıje tabıǵı dep aıtýǵa negiz bar», - dedi Aleksandr Danılov.