Ulttyq keńes músheleri Prezıdenttiń tótenshe jaǵdaıǵa qatysty is-qımylyna qoldaý bildirdi

NUR-SULTAN. QazAqparat - Aıdos Sarym, Erlan Saıyrov, Talǵat Qalıev, Baǵdat Mýsın, Aınur Sábıtova, Andreı Chebotarev, Berik Ábdiǵalı, Murat Ábenov, Seıdahmet Quttyqadam syndy tanymal qoǵam qaıratkerleri jáne Ulttyq qoǵamdyq senim keńesiniń músheleri qazaqstandyqtarǵa arnap úndeý qabyldady. Onda Memleket basshysy jarııa etken sharalarǵa qoldaý bildirilgen. Ulttyq keńes músheleri azamattardy halyqtyń áleýmettik turǵyda az qamtylǵan tobyna, ásirese kómek qajet etetinderge qamqorlyq tanytýǵa shaqyrdy, dep habarlaıdy QazAqparat tilshisi.

Ulttyq qoǵamdyq senim keńesiniń músheleri óz úndeýlerinde tótenshe jaǵdaı rejımi kezeńinde aýyzbirlik tanytý qajettigin atap ótedi.

«Dúnıejúzi tap bolǵan daǵdarysty jaǵdaı jahandyq ekonomıkalyq keńistikte kúrdelenip bara jatyr. Ǵalam ekonomıkasy tereń ári júıeli ózgeristerdi bastan keshirýde. Álemdik naryq quldyrap, álemdik valıýtalar soqqy astynda qaldy. Búkil el aıtarlyqtaı ekonomıkalyq qıyndyqtar men problemalarǵa tap bolýda», - delingen úndeýde.

Úndeýde búkil qoǵam ózara kómek, yntymaqtastyq, ortaqtastyq syndy qundylyqtar tóńiregine toptasyp jatqany atap ótiledi. Іndet qaýpi aldynda adamdar uıymdasyp, qıyndyqtardy birge eńseredi, májbúrli bolǵanymen asa qajetti shekteýlerge túsinistikpen qaraıdy. Ulttyq keńes músheleri de qazaqstandyqtardy dál osyǵan shaqyrady.

«Biz osynaý indetpen jalpyhalyqtyq kúres boıynsha Memleket basshysy Qasym-Jomart Toqaev usynǵan sharalardy jan-jaqty qoldaımyz. Osynaý kúrdeli ári qıyn sátte memleket pen qoǵam, bılik pen azamattar bárimizdiń aldymyzda turǵan syn-tegeýringe qarsy birlik pen yntymaqqa qabiletti ekendigin kórsetýi tıis. Biz halyqtyń áleýmettik turǵyda az qamtylǵan tobyna, ásirese kómek qajet etetinderge qamqorlyq tanytýǵa shaqyramyz. Qart adamdarǵa, eń birinshi kezekte jańa vırýs táýekeline ushyraǵandarǵa aıryqsha nazar aýdaryp, qamqorlyq tanytýymyz kerek. Dárigerlerge, medıtsına qyzmetkerlerine jáne indetpen kúrestiń aldyńǵy shebinde júrgenderge kómektesýge tıispiz», - dep atap ótiledi úndeýde.

Ulttyq keńes músheleriniń paıymynsha, ýaqytsha shekteýlerge túsinistikpen qarap, olardy saqtaý mańyzdy. Sol arqyly ózimizge, otbasymyzǵa jáne tóńiregimizdegilerge qamqorlyq tanytamyz. Tek solaı ǵana qazaqstandyqtar óz elin, halqyn jáne árbir otbasyn indetten qorǵaı alady. Al memleket óz tarapynan barlyq qajetti sharalardy qolǵa alyp, indettiń aldyn orap áreket etetin bolady.