Ulttyq keńes qurylǵan alty aıdyń ishinde qandaı jumystar atqaryldy - sarapshy

NUR-SULTAN. QazAqparat – Eýrazııalyq ıntegratsııa ınstıtýtynyń sarapshysy Baýyrjan Serikbaev Ulttyq qoǵamdyq senim keńesi qurylǵaly beri alty aıdyń ishinde atqarylǵan jumystardy qorytyndylady, dep habarlaıdy QazAqparat tilshisi.

Eýrazııalyq ıntegratsııa ınstıtýtynda «Ulttyq qoǵamdyq senim keńesi: taldamalyq zerdeleý» atty saraptamalyq baıandama jasaǵan sarapshy keńes qurylǵaly beri eki basqosý ótkenin eske saldy.

«Osy otyrystar qandaı máselelerdi qamtyp, naqty qandaı jumystar isteldi? Birinshiden, beıbit jıyn ótkizý týraly zań jobasy qazir halyqtyń talqylaýy úshin ınternetke shyqty. Bul jerde bizdiń kez kelgen azamatymyz zańnyń árbir baby boıynsha oı-pikirlerin aıta alady. Zań jobasy Parlamentke shyqpaı turyp, qoǵamnyń óz usynystarymen oǵan ózgeris engizýge múmkindigi bar. Ekinshiden partııany tirkeý úshin 20 myń adamnyń qoly jetkilikti. Ózderińiz biletindeı burynǵy talap – 40 myń adam bolǵan edi. Úshinshisi – Qylmystyq kodekstiń 174-babyn (Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý) qaıta qarastyrý. ıAǵnı buryn bul bap boıynsha bas bostandyǵynan aıyrýǵa deıingi jaza taǵaıyndalyp kelse, qazir bul jazany ákimshilik jazaǵa aýystyrý protsesi júrip jatyr. Parlamenttik oppozıtsııa boıynsha da talqy kóp. Parlamentte mindetti túrde oppozıtsııa bolýy kerek, óz oılaryn aıtatyn partııalar da Parlamentke kirý kerek degen oń ózgerister bolyp jatyr», - dedi Baýyrjan Serikbaev elordada ótken baıandamanyń tanystyrylymynda.

Sarapshy Ulttyq keńeske qatysty qoǵamda túrli synı paıym-pikirler aıtylyp jatqanyn zańdylyq dep qabyldaý kerektigin aıtady.

«Biz synnan qashpaýymyz kerek. Olardy tyńdaı otyryp, kerisinshe Ulttyq keńestiń jumysyn jetildirip, ony halyq únin bılikke jetkizetin platforma bolatyndaı deńgeıge alyp shyqqanymyz abzal. Ulttyq keńes – jańadan qurylǵan uıym. Qazirgi tańda onyń otyrystaryn aımaqtarda ótkizýge qatysty usynystar aıtyldy. Rasynda da, aımaqtarda biz estip, bilmeı jatqan problemalar barshylyq. Bir ǵana mysal – Qordaı oqıǵasy. Sol sebepti jedel túrde oqıǵa ornyna shyǵyp, máseleni jergilikti jerde talqylasa meniń oıymsha, belgili bir pozıtıvti ózgerister bolar edi. Sonymen qatar ulttyq keńestiń otyrysyn úsh aıda bir márte emes, múmkindiginshe aıyna bir ret ótkizip, Ulttyq keńestiń rólin arttyrý kerek degen oıdamyn», - deıdi ol.

Sarapshynyń aıtýynsha, elimizde «Memlekettik til týraly» jańa zańdy qabyldaý máselesi de ózektiligin arttyryp keledi. Bul zańǵa degen halyq pen qoǵam tarapynan suranys joǵary bolyp otyr.