Ulttyq keńes: Áleýmettik-ekonomıkalyq reformalardyń prezıdenttik paketi týraly baıandama tanystyryldy

NUR-SULTAN. QazAqparat - Ulttyq qoǵamdyq senim keńesiniń aıasynda «Ulttyq qoǵamdyq senim keńesi aıasyndaǵy áleýmettik-ekonomıkalyq reformalardyń prezıdenttik paketi» taldamaly baıandamasynyń tanystyrylymy ótti. Berilgen baıandama «TALAP» qoldanbaly zertteýler ortalyǵymen birlesip daıyndaldy, dep habarlaıdy QazAqparat.

Sharaǵa belgili qazaqstandyq sarapshylar, ekonomıster, Ulttyq qoǵamdyq senim keńesiniń músheleri men Parlament Májilisiniń depýtattary qatysty. Sharany QR Prezıdentiniń kómekshisi, Ulttyq keńestiń hatshysy Erlan Karın ashty.

Baıandamany UQSK múshesi, ekonomıst Rahym Oshaqbaev tanystyrdy. Tanystyrylym barysynda taldamalyq qujatta Ulttyq keńestiń otyrystarynda Memleket basshysynyń usynǵan áleýmettik-ekonomıkalyq reformalaryn júzege asyrý nátıjeleri kórsetilgenin atap ótti.

Atap aıtqanda, UQSK qyzmeti aıasynda baǵamdyq saıasat ashyqtyǵyn arttyrý: aı saıyn jáne toqsan saıyn valıýta naryǵyna Ulttyq qordan transfertter aıyrbastalǵanyn jarııalap otyrý, Ulttyq qordan transfertter aıyrbastaý kestesin jarııalaý; ǵaryshtyq monıtorıngti qoldaný jáne aýyl sharýashylyǵy maqsatyndaǵy jerlerdi sheteldikterge jáne sheteldik zańdy tulǵalarǵa satýǵa jáne jalǵa berýge tyıym salý týraly zań qabyldaý; tsıfrlanǵan málimetter bazasy túrinde Syrtqy qaryzdyń biryńǵaı reestri ázirleý; kvazımemlekettik sektordaǵy áleýmettik mańyzy bar kásiporyndardyń dırektorlar keńesine azamattyq qoǵam ókilderin engizý; sheteldik jumys kúshin tartý kvotasyn 40%-ǵa tómendetý; mektepke deıingi tárbıe men oqytýdy damytýdyń tolyqqandy modelin bekitý; bolashaq muǵalimder men dárigerlerdiń shákirtaqysyn arttyrý jáne taǵy basqalar.

Sonymen qatar, talqylaý barysynda sarapshylar prezıdenttik bastamalardyń kópshiligi Ulttyq keńes músheleriniń usynystary men usynystaryn eskere otyryp ázirlengenin basa aıtty.

Óz kezeginde, Prezıdent kómekshisi Erlan Karın Ulttyq keńes áleýmettik mańyzy bar bastamalardy ázirleýmen qatar, konsýltatıvtik-keńesshi organ sheńberinde buryn usynylǵan reformalardyń iske asyrylýyn baqylaýdy júzege asyratynyna nazar aýdardy.

Osylaısha, usynylǵan baıandamadan basqa, Prezıdenttiń saıası reformalarynyń júzege asyrylýy men beıbit jınalystar týraly jańa zańnyń qoldanylýy boıynsha taldamalyq sholýlar jarııalanǵan bolatyn. Aldaǵy ýaqytta Ulttyq keńes aıasynda prezıdenttik bastamalardy iske asyrýǵa qatysty basqa da analıtıkalyq basylymdar daıyndalatyn bolady.

Qazirgi ýaqytta Ulttyq keńes arqyly 17 zań men 80 -ge jýyq normatıvtik quqyqtyq aktiler qabyldandy. 15 -ten astam zań jobasy ázirleý men qaraý satysynda.