Ulttyq qaýipsizdikti aıta bermeı, týrızmdi damytýdy da oılaıyq - Arystanbek Muxamedıuly

ASTANA. QazAqparat - QR Mádenıet jáne sport mınıstri Arystanbek Muxamedıulynyń aıtýynsha, búginde elimizde shet el azamattary úshin vızany elektrondy túrde alý júıesin engizý máselesi talqylanyp jatyr. Sebebi týrısterdiń kóbisi Qazaqstanǵa kelgisi keledi. Alaıda vıza alý kezinde san alýan qıynshylyqtarǵa tap bolatyny jaıynda jıi aıtady, dep xabarlaıdy QazAqparat tilshisi.

«Jaqynda biz shekara qyzmetimen (QR Ulttyq qaýipsizdik komıtetiniń qurylymy - avt.) kezdesip, elektrondy vızaǵa kóshý máselesin talqylaǵan edik. Aldaǵy ýaqytta «Tsıfrlyq Qazaqstan» memlekettik baǵdarlamasy aıasynda osy máseleni sheshetin bolamyz. Shyny kerek, bizdiń qazirgi vıza berý júıemiz óte kúrdeli ári qatań. Eń qyzyǵy, bári ony ulttyq qaýipsizdikpen túsindiredi. Men aıtamyn, barlyq álem týrızm arqyly ınvestıtsııany tartýdy oılaıdy, jalǵyz qazaq qana ulttyq qaýipsizdigin oılap otyr. Shyn máninde, vıza berý máselesin jeńildetý kerek», - dedi Muxamedıuly búgin otandyq týrızmdi damytý máselelerine arnalǵan jıynda.

Mınıstrdiń aıtýynsha, aldaǵy ýaqytta Qazaqstan arqyly tranzıtpen ótetin Iran men Úndistan azamattary úshin 72 saǵatqa deıingi vızasyz rejımdi engizý josparlanyp otyr. «Menińshe, aldaǵy eki aptanyń ishinde osy másele sheshiledi», - dep atap kórsetti Muxamedıuly.

Aıta keteıik, búginde 72 saǵatqa deıingi vızasyz rejım Qytaı azamattary úshin engizilgen. Atalǵan bastama EKSPO kórmesi aıasynda pılottyq joba retinde qolǵa alynyp otyr. Oǵan sáıkes, Astana men Almaty áýejaılary arqyly basqa elderge ushyp bara jatqan qytaılyq týrıster Qazaqstanda úsh kún boıy vızasyz júre alady.