Ulttyq qaýipsizdik strategııasy: Qujatta negizgi syn-qaterlerge qarsy is-qımyldar qamtylǵan

NUR-SULTAN. QazAqparat – Memleket basshysy Qasym-Jomart Toqaev qol qoıǵan Qazaqstan Respýblıkasynyń 2021-2025 jyldarǵa arnalǵan Ulttyq qaýipsizdik strategııasynda taıaýdaǵy 5 jylda bolýy múmkin dep boljanǵan negizgi syn-qaterlerge qarsy is-qımyldar qamtylǵan, dep habarlaıdy QazAqparat.

Ulttyq qaýipsizdik strategııasy budan buryn Tuńǵysh Prezıdent – Elbasy Nursultan Nazarbaevtyń tóraǵalyǵymen ótken Qaýipsizdik Keńesiniń otyrysynda qaralyp, maquldanǵan jáne eldiń ulttyq múddelerin qorǵaýǵa qatysty tujyrymdamalyq jaǵynan jańartylǵan tásilderdi qamtıdy.

Strategııa – Prezıdent Qasym-Jomart Toqaevtyń tapsyrmasy boıynsha engiziletin memlekettik josparlaýdyń jańa júıesiniń negizgi qujattarynyń biri. Osyǵan oraı qujatta taıaýdaǵy bes jylda bolýy múmkin dep boljanyp otyrǵan negizgi syn-qaterlerge qarsy is-qımylǵa basa mán berilgen.

«Atap aıtqanda, birinshiden, koronavırýs pandemııasynyń jalǵasýy jáne bıologııalyq qaýipsizdiktiń basqa da qaterleri. Ekinshiden, ekonomıkany, eńbek qatynastaryn, áleýmettik salany, aqparattyq keńistik pen kommýnıkatsııany túbegeıli ózgertetin tehnologııalyq ózgerister. Úshinshiden, qarjy-ekonomıka salasyna áser etken syrtqy naryqtardaǵy daǵdarys jaǵdaıy. Tórtinshiden, jahandyq jáne óńirlik arenada daǵdarystyń odan ári ýshyǵýy keri áser etedi.

Osyǵan baılanysty álemniń kóptegen damyǵan elderi qazirgi halyqaralyq jáne ishki jaǵdaılardy eskere otyryp, ulttyq qaýipsizdikti qamtamasyz etý jónindegi ózderiniń saıasatyn qaıta qaraıdy», - delingen Aqorda málimetinde.