Ulttyq qaýipsizdik komıteti akademııa kýrsantynyń ólimine qumar oıyn sebep bolǵanyn moıyndady

ASTANA. QazAqparat – QR UQK Akademııasy kýrsantynyń ózine qol salý oqıǵasynan keıin tıisti vedomstvo taldaý júrgizdi. Bul týraly QR Ulttyq qaýipsizdik komıteti tóraǵasynyń orynbasary Marat Qalqabaev málim etti, dep habarlaıdy QazAqparat tilshisi.

Búgin Májilistiń jalpy otyrysynda depýtat Magerram Magerramov lýdomanııa, ıaǵnı qumar oıyndarǵa táýeldilik máselesin kóterdi.

«Qumar oıyndarǵa táýeldilik kóbinese zańsyz áreketter jasaýǵa jáne ózine qol salýǵa ákeledi. Jaqynda Almatydaǵy UQK akademııasynda kýrsanttyń qaıǵyly qazasy boldy. Atap aıtqanda, kýrsanttardyń qumar oıyndarǵa táýeldiligi máselesine qatysty tıisti baqylaý júrgizilip jatyr ma?», - dep surady depýtat.

Óz kezeginde Ulttyq qaýipsizdik komıteti tóraǵasynyń orynbasary Marat Qalqabaev qazirgi kezde qylmystyq is boıynsha tergeýdi polıtsııa júrgizip jatqanyn aıtty.

«Tergeý amaldarynyń nátıjesinde tıisti qorytyndy shyǵaramyz. Sonymen qatar, biz bul derek boıynsha qyzmettik tekserý júrgizdik. Ulttyq qaýipsizdik organdaryna qyzmetke jáne oqýǵa qabyldaý kezinde úmitkerler jan-jaqty, onyń ishinde «shyndyq detektory» arqyly psıhologııalyq tekserýden ótedi. Budan keıin akademııadaǵy qyzmetkerlerge qatysty tıisti monıtorıng júrgiziledi, bizde arnaıy psıhologııalyq jáne kadr qyzmeti bar. Sonymen qatar, ishki qaýipsizdik departamenti de qyzmet atqaryp jatyr», - dedi M. Qalqabaev.

Onyń aıtýynsha, bul baǵytta tıisti taldaý jasalyp, eleýli túzetýler engizildi.

«Qumar oıynynyń saldary (akademııady) bizde de baıqalyp otyr. Bul Ulttyq qaýipsizdik komıteti akademııasynyń tarıhyndaǵy jalǵyz jaǵdaı. Eń bastysy, adamnyń qumar oıyndarǵa bet bura bastaǵanyn bastapqydan anyqtaý kerek. Osy baǵytta tıisti is-sharalar júzege asyrylady», - dedi UQK ókili.

Budan buryn habarlanǵandaı, bıyl sáýir aıynyń aıaǵynda QR UQK Akademııasynyń kýrsanty ózineqol saldy.