Ulttyq ǵylymı-tehnıkalyq aqparat ortalyǵyn qaıta ashý kerek – Prezıdent

ALMATY. QazAqparat – Ulttyq ǵylym akademııasynyń 75 jyldyǵyna arnalǵan saltanatty sessııa barysynda Memleket basshysy Qasym-Jomart Toqaev ǵylymı zertteýler men tehnologııalyq jobalar óz salasynyń qajetin óteýi kerektigine toqtaldy. Prezıdent sonda ǵana ınnovatsııalyq damý maqsattaryna qol jetkize alatynymyzdy aıtty, dep habarlaıdy QazAqparat Aqordaǵa silteme jasap.

«2013 jyly munaı-gaz óndirý salasynda keshendi jumys atqaryldy. Ony ǵylymı-tehnologııalyq jaǵynan damytýdyń jol kartasy jasaldy. Mundaı jumys barlyq salada júrgizilýge tıis. Mysaly, Ońtústik Koreıa men Japonııada osy jumysty arnaýly ınstıtýttar atqarady. Olar ǵylymdy jáne tehnologııalardy josparlaýmen, baǵalaýmen aınalysady, ǵylymı-tehnıkalyq aqparatty taldaıdy», - dedi Memleket basshysy.

Prezıdent Qazaqstanǵa da tyń zertteýler júrgizip, tehnologııany damytý isin úılestiretin ortalyq qajettigin aıtty.

«Sondyqtan, burynǵy Ulttyq ǵylymı-tehnıkalyq aqparat ortalyǵyn qaıta ashý kerek dep sanaımyn. Ǵylymı qyzmetti tıimdi basqarý jáne sybaılas jemqorlyqtyń aldyn-alý – mańyzdyń mindettiń biri. Sol sebepti, osy saladaǵy barlyq úderisti tezirek tsıfrlandyrý kerek. IT salasyndaǵy sońǵy jetistikterdi paıdalanyp, Qazaqstan ǵylymynyń biryńǵaı ekojúıesin qalyptastyrýǵa tıispiz», - dedi Qasym-Jomart Toqaev.

Buǵan deıin Prezıdent burǵynǵy jetistikterge marqaıyp otyra berýge bolmaıtynyn aıtty.

Sondaı-aq, akademıkter barynsha ashyq ári ádil saılanýy qajet dedi. Ulttyq ǵylym akademııasynyń mártebesin kóterý kerektigine toqtaldy. Ǵylymmen aınalysatyn akademıkterge ómir boıy aı saıyn stıpendııa berý máselesi sheshiletinin jetkizdi.