Ulttyq Gvardııanyń 12 jaýyngeri «kúreń beretti» qorǵady

PAVLODAR. QazAqparat – Pavlodarda Ulttyq Gvardııa arnaıy bólim jaýyngerleriniń kúreń beretti taǵý quqyǵyn ıelenýge arnalǵan kvalıfıkatsııalyq synaqtary aıaqtaldy, dep habarlaıdy QazAqparat Ulttyq Ulannyń «Shyǵys» óńirlik qolbasshylyǵy baspasóz qyzmetiniń basshysy Baǵdat Amangeldige silteme jasap.

Bıyl kvalıfıkatsııalyq synaqqa qatysýǵa arnaýly jasaqta kem degende 3 jyl qyzmet etken 500 áskerı qyzmetker nıet bildirdi. Olardyń 47-si ary qaraı ótýge ruqsat aldy.

Ush kezeńnen turatyn kvalıfıkatsııalyq synaqtan ótý ońaıǵa soqqan joq. Jaýyngerler fızıkalyq jáne atys daıyndyǵy boıynsha normatıvter tapsyrdy.

Sońǵy kúni 14 úmitker 12 shaqyrymdyq jedel marshty baǵyndyrýǵa shaqty. Jaýyngerler belgili bir baǵyt boıynsha sýly, balshyqty jerlerden ótti.

Alaıda jedel marshtan 14 úmitkerdiń 12-si ǵana kelesi synaqqa ótkizildi.

Úmitker Aslanbek Nákishev kúreń beretti taǵý mártebesin ıelený úshin 6 jyldan beri baǵyn synap kelgen. Bıyl aıy ońynan týyp otyr.

«Qıyn boldy. Ár normatıvti joǵary deńgeıde ótýiń kerek, sondyqtan ýaıymdaı bastaısyń. Tipti qoıan-qoltyń urystyń sońǵy kezeńinde qulap jatsam da, berilmeımin dep, ornymnan turyp, sońyna deıin kúrestim», - deıdi Aslanbek.

Bıyl biliktilik synaqtary jańa formatta ótkenin atap ótý kerek. Olar praktıkalyq normatıvterdi oryndaý ýaqytyn qysqartý arqyly bir izge salyndy. Osylaısha búginde burynǵy 75 shaqyrym qashyqtyq 12 shaqyrymǵa qysqartyldy. Alaıda tapsyrylatyn normatıvter sany eki ese ósti.

«Ár adam aldyna qol jetkizgisi keletin maqsattar qoıady jáne búgin 12 jaýynger bul tapsyrmany oryndady. Alaıda bul ótpeı qalǵandar mindetterin atqara almaıdy degen sóz emes. Bul adamdar kún saıyn ishki ister, ulttyq qaýipsizdik organdarymen birlesip qylmysqa qarsy kúres júrgizedi», - dedi Ulttyq Gvardııa bas qolbasshysy general-maıor Albert Matkárimov.

Búginde Qazaqstan Respýblıkasy Ulttyq Gvardııa qatarynda kúreń beretti taǵý quqyǵyna ıe 150 áskerı qyzmetker jumys atqarýda.