Ulttyq ekonomıkanyń básekege qabiletin arttyrý qajet - Serik Jumanǵarın

ALMATY. QazAqparat – Ulttyq ekonomıkanyń básekege qabilettiligin arttyrý qajet. Bul týraly Básekelestikti qorǵaý jáne damytý agenttiginiń tóraǵasy Serik Jumanǵarın Almatyda ótip jatqan VII Eýrazııalyq monopolııaǵa qarsy forýmynda aıtty, dep habarlaıdy QazAqparat tilshisi.

Onyń aıtýynsha, eldegi negizgi ekonomıkada naryqtyq bılik pen monopolııalandyrýdy boldyrmas úshin básekelestiktiń tepe-teńdik deńgeıine jetý kózdelgen. Sondyqtan jıynda kóteriletin básekelestik tóńiregindegi máseleler elimizdiń aldaǵy damýy úshin óte mańyzdy.

Sonymen qatar, Serik Jumanǵarın básekelestikti damytýǵa jáne úzdik halyqaralyq tájirıbeni eskere otyryp monopolııaǵa qarsy zańnamany jetildirýge kómektesý - agenttik qyzmetiniń basym baǵyttary ekenin atap ótti.

«Elderimizdiń naryq sýbektileri úshin teń básekelestik jaǵdaı – ulttyq ekonomıkalardyń básekege qabilettiligin arttyrýdyń mańyzdy faktory», - deıdi ol.

Sondaı-aq forým barysynda Eýrazııalyq ekonomıkalyq komıssııanyń básekelestik jáne monopolııaǵa qarsy retteý jónindegi mınıstri Arman Shaqqalıev básekelestikti damytýdyń jańa tásilderin atady.

«Tsıfrlyq platformalardyń qyzmetin keńeıtý, halyqaralyq kartelderdi jandandyrý, transulttyq korporatsııalardyń rólin kúsheıtý sııaqty básekelestikti damytýdyń jańa syn-qaterlerine is júzinde ulttyq deńgeıde tıimdi jaýap berý múmkin emes. Osy turǵyda komıssııa men ulttyq monopolııaǵa qarsy vedomstvolardyń yntymaqtastyǵy birinshi orynǵa shyǵady. Sondyqtan Eýrazııalyq monopolııaǵa qarsy forým sııaqty alańdar bizge tıimdi pikir almasýǵa ǵana emes, sonymen qatar «saǵattardy salystyryp tekserýge», odan ári yntymaqtastyqtyń vektorlaryn anyqtaýǵa múmkindik beredi», - deıdi Arman Shaqqalıev.

Aıta keteıik, Almatyda jeti eldiń monopolııaǵa qarsy sarapshylary básekelestikti damytý salasyndaǵy eń ózekti máselelerdi talqylap jatyr.