Ulttyq ekonomıka mınıstri: Áleýmettik azyq-túlikke baǵany usynyp otyrý qajet
Bul týraly búgin QR Úkimeti otyrysynda elimizdiń Ulttyq ekonomıka mınıstri Qýandyq Bıshimbaev málim etti.
«Bólshek saýda baǵasyn retteý men normatıvtik-quqyqtyq derekterdi jańartý tetikterin jetildirý boıynsha jumysty jalǵastyrý qajet. Osyǵan oraı mınıstrlikte osy jyldyń jazynda áleýmettik mańyzy bar azyq-túlik taýarlarynyń barlyq óndirýshileri, kóterme saýdagerleri men dıstrıbıýterleri boıynsha taldaý júrgizýge múmkindik beretin analıtıkalyq derek qurylǵan», - dedi ol
Osyǵan baılanysty mınıstr, kelesi zańnamalyq jáne uzaq merzimdi sharalardy usyndy. «Shekti men shekti ruqsat etiletin baǵany zańnama deńgeıinde pysyqtaý qajet. Alyp-satý baǵasynyń ósýi kezeńinde saýda ústemesin 20-25 paıyz deńgeıde belgileý boıynsha normatıvtik quqyqtyq aktilerge ózgerister engizýdi usynamyz. Naryqtar men bazarlardyń satýshy sóresine otandyq óndirýshiler tikeleı kirýi kerek. Shartty túrde ákimshilikter naryqqa áser ete almaıdy. Ol jaqta monopolııalandyrý júrgizilip jatyr. Munan bólek, zańnamada áser etý tetigi kózdelmegen. Zańnamada otandyq óndirýshilerge 25-30 paıyzdyq saýda-sattyq alańyna ruqsat belgileýdi maqsatqa sáıkes dep esepteımiz», - dedi ol.
Q.Bıshimbaev barlyq saýda-sattyq bazarlarynda áleýmettik mańyzy bar azyq-túlikterge usynys baǵalaryn belgileý qajettigin atap ótti. Sondaı-aq orta merzimdik bolashaqta ımportqa táýeldi taýarlar irimshik, aq irimshik, qant, qus eti, suly jáne qaraqumyqty óndirýdi ulǵaıtý boıynsha sharalardy qoldaný usynylyp jatqanyn eske saldy.
«Azyq-túlik taýarlaryn jáne aýylsharýashylyǵy jármeńkelerin ótkizýdi júzege asyratyn «áleýmettik» dúkender, saýda-sattyq oryndardy ashý boıynsha ótken jyldary bastaǵan jumystardy jalǵastyrý kerek. Kóterme saýda-sattyq úılerinde azyq-túlik taýarlaryna joǵary baǵalardy eskere otyryp, qalalar janyndaǵy úlken kóterme bazarlaryn salýǵa ınvestıtsııalaýdy yntalandyrý maqsatqa sáıkes dep esepteımiz», - dedi mınıstr.
Sonymen qatar Q.Bıshimbaev, baǵany turaqtandyrý boıynsha aýmaqtyq shtabtardy, sondaı-aq aýmaqtaǵy aǵymdaǵy jaǵdaıdy taldaý men aqparatty jınaý boıynsha jumystardy iske qosý qajettigin aıtty.