Ulttyq ekonomıka mınıstri 10 jyl boıy ıpotekany qalaı tólegenin aıtty

ASTANA. QazAqparat - QR Ulttyq ekonomıka mınıstri Tımýr Súleımenov 10 jyl boıy ıpotekalyq qaryzyn japqan kezde qınalǵanyn aıtty. Bul jaıynda ol Parlament Senatynda Jastar jylyn ótkizý aıasyndaǵy maqsattarǵa arnalǵan dóńgelek ústelde sóz etken bolatyn, dep habarlaıdy QazAqparat.

«Ótken jyly ıpotekalyq nesıe boıynsha 10 jyldyq tólem merzimin aıaqtadym, ıaǵnı 2008 jyly nesıeni alǵan bolatynmyn. Bul tólem aıtarlyqtaı aýyrtpalyq túsiretinin bilemin. Osy oraıda jastarǵa tıisti úndeý jasaǵym keledi. Únemi ózińniń múmkindigińe qaraı shamalap, esepteý júrgizý kerek. Bizde arendalyq baspana bar. Máselen, biz dilimizdi eskere otyryp, jeke baspana alýǵa tyrysamyz. Birinshiden, adam baspanaǵa qatty baılanyp qalady jáne tólemniń orta kezine jetkende adam osydan psıhologııalyq turǵyda qaljyraıdy. Óıtkeni bir aıdaǵy tabystyń basym bóligin ıpotekaǵa beresiz. Sondyqtan buǵan basqasha kózqaras bolǵan jón. Eńbek mobıldigin eskere otyryp, ıaǵnı búgin Atyraýda bolsań, erteń Pavlodarda, keıinnen Almatyǵa qonystanýyń múmkin. Bul rette arendalyq baspanaǵa basqasha kózqaras qalyptastyrý kerek», - dedi Tımýr Súleımenov.

Onyń paıymynsha, baspana máselesinde tek ıpotekaǵa qaraýdyń reti joq.

«Ipotekany múmkindiginshe arzandatýǵa bolady. Alaıda qaryz alǵan adamdar ózderiniń múmkindikterin durys esepteı almaı, keıinnen qıyn jaǵdaıǵa tap bolýy yqtımal», - dedi mınıstr.