Ulttyq dombyra kúni: Qazaqtyń kúıleri metroda kúmbirledi

ALMATY. QazAqparat -  Almaty metrosynda qazaqtyń kúıleri kúmbirledi. Qurmanǵazy atyndaǵy Qazaq memlekettik akademııalyq halyq aspaptary orkestriniń 18 ónerpazy bir ýaqytta jerasty vagonynyń ishin áýenge bóledi, dep habarlaıdy QazAqparat tilshisi.

Kúmbirlegen kúı sharshaýly metro jolaýshylarynyń kóńilin bir serpiltip tastady. Jurtshylyq fleshmobty jappaı sýretke, vıdeoǵa túsire bastady.

Ulttyq kıim kıgen kúıshiler «Muhtar Áýezov atyndaǵy teatr» beketinen Raıymbek beketine deıin keldi.

Uıymdastyrýshylar Elbasy N.Á.Nazarbaevtyń bastamasymen 1 shilde kúni alǵash ret ótkiziletin «Ulttyq dombyra kúni» merekesin nasıhattap, qazaqtyń ulttyq aspaby - dombyrany dáripteý men mádenı ulttyq birlikti nyǵaıtýdy maqsat tutqan.

 «Qurmanǵazy atyndaǵy Qazaq memlekettik akademııalyq halyq orkestri ujymynyń atynan Elbasymyzǵa alǵys aıtamyz. Kúı merekesi - barsha dombyrashylar men ónerpazdar úshin úlken serpilis bolmaq. Dombyra kúni aıasynda Qurmanǵazy atyndaǵy orkestr óziniń aýqymdy is-sharalaryn qolǵa alyp otyr. Basty shara - Qazaq eli alańynda ótetin «Dombyra - asyl mura» atty úlken kontserttik is-shara. Almaty metropolıteninde Qurmanǵazy orkestriniń dombyrashylary Qurmanǵazynyń «Adaı», «Balbyraýyn», «Saryarqa», «Aqsaq kıik», Dáýletkereıdiń «Kóroǵly», «Qos alqa», «Jiger» «Topan» kúılerin oryndady. Al 1 shilde kúni ótetin kúı sherýinde atalǵan shyǵarmalardy 3 myń ónerpazdyń oryndaýynda tyńdaı alasyzdar», - deıdi Qazaqstannyń eńbek sińirgen qaıratkeri, Qurmanǵazy orkestriniń dırektory Nurǵısa Daýeshov.

Qurmanǵazy atyndaǵy okrestrdiń qurylǵanyna bıyl 85 jyl tolýyna oraı shyǵarmashylyq ujym aǵymdaǵy jyly álemniń basqa da metrolarynda qazaqtyń qara dombyrasynan kúı tókpek.