Ulttyq brendti anyqtaý ótinimderiniń eshqaısysy eleń etkize almady

ASTANA. QazAqparat - Qazaqstannyń ulttyq brendin anyqtaý konkýrsyna túsken ótinimderdiń birde-biri zor qyzyǵýshylyq týdyra almady. Bul týraly búgin Úkimet úıinde ótken baspasóz máslıhatynda QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.

«Iá, shynymen de bizde Qazaqstannyń ulttyq brendin anyqtaý boıynsha konkýrs ótkizý týraly tapsyrma bolǵan edi. Ózderińizde jaqsy bilesizder, 960 ótinim tústi. Azamattar tarabynan qyzyǵýshylyq óte úlken boldy. Biraq birde-bir ótinim saraptama toptyń, eksperttik komıssııanyń jiti nazaryn aýdarta alǵan joq. ıAǵın, birde-bir konkýrstyq ótinim zor qyzyǵýshylyq týdyrmady. Menińshe, bul jumysty Syrtqy ister mınıstrligimen, memlekettik organdarmen, QR Prezıdenti ákimshiligimen birlesip, osy jyldyń kúzinde jalǵastyratyn bolamyz», - dedi Dáýren Abaev BAQ ókilderiniń saýalyna oraı.

Aıta keteıik, Qazaqstan Respýblıkasynyń Ulttyq brendin anyqtaý jónindegi Baıqaýǵa qatysýshylar mynalardy usynýy tıis:

1. Logotıp - álemdik arenada Qazaqstannyń tanymaldyǵyn arttyrý úshin qoldanatyn grafıkalyq belgi (emblema/sımvol). Onda stıldengen áripter jáne/nemese sóz túrinde sáıkestendirgen brendtiń ataýy  kórinis tabýy qajet. Logotıp jpeg, png, giff formattarda, 1000x1000 px kóleminde usynylýy tıis.

2. Uran - týrıstik jáne ınvestıtsııalyq tartymdylyqty arttyra otyryp, qazaqstandyq brendke degen senimdiligin kúsheıtý arqyly maqsatty aýdıtorııanyń nazaryn tartýǵa arnalǵan jarnamalyq kommýnıkatsııanyń barlyq túrinde qoldanylatyn habarlamany sıpattaıtyn ımıdjdik devız bolyp tabylady. Uran ońaı oqylatyn, jınaqy, qyzyǵýshylyq týǵyzatyn bolýy tıis jáne memlekettik, orys jáne aǵylshyn tilderinde usynylýy kerek.

3. Qazaqstan Respýblıkasy Ulttyq brendiniń tujyrymdamasyn erkin formatta memlekettik jáne orys tilderinde daıyndap, usynýǵa bolady.