Ulttyq birlikti saqtaýdaǵy Assambleıanyń mańyzy zor - I. Hashımjanov
Bul týraly búgin Astanada «Qazaqstannyń memlekettik etnosaıasatyn ǵylymı-saraptamalyq qamtý: mindetteri men perspektıvalary» atty taqyrypta ótken «dóńgelek ústel» barysynda Ózbek mádenıet ortalyǵynyń basshysy Ikram Hashımjanov málim etti.
«Keshegi kúni ótken Qazaqstan halqy Assambleıasynyń 19-sessııasy biz úshin erekshe oqıǵa bolyp tabylady. Memleket basshysy ondaǵy sózi barysynda bizdiń memleketimiz úshin strategııalyq sıpattaǵy mańyzdy úsh baǵytqa erekshe nazar aýdardy. Bular - turaqtylyq, birlik pen jańǵyrý. Elbasy osy úsh negizgi salanyń árqaısysyna ulttyq mádenıet ortalyqtary úshin de basym bolyp tabylatyn baǵyttardy aıqyn kórsetti», - deıdi Ikram Hashımjanov.
Onyń aıtýynsha, Assambleıa sessııasynda Prezıdent nazar aýdartqan baǵyttar etnomádenı ortalyqtar úshin de aıqyn ári túsinikti. «Máselen, biz Ońtústik Qazaqstan oblysynda EQYU az ulttar jónindegi Joǵarǵy komıssarmen jumys isteımiz, onda bilim mekemelerinde eki tilde jáne kóptilde bilim berý júıesin engizýge basa nazar aýdarylady. Sonyń arqasynda mektepte ana tilimen qatar balalarymyz qazaq jáne oris tilderinde bilim alyp júr. Mektepti bitirgen balalarymyz úsh tilde erkin sóıleı alady. Bunyń ózi bizdiń balalarymyzdyń áleýmettik jáne eńbek ıntegratsııasy úshin úlken múmkindikter qalyptastyryp, básekege qabilettiligin arttyratyny sózsiz»,- deıdi ol.
Ortalyq basshysynyń aıtýynsha, Qazaqstanda birlikti saqtaýda Qazaqstan halqy Assambleıasy mańyzdy ról atqaryp otyr. «Bul rette Assambleıanyń mindeti ultaralyq qatynastardy úılesimdi etý bolsa, onyń ózi memlekettiń turaqtylyǵyn nyǵaıtý degendi bildiredi. Sol úshin Qazaqstan halqy Assambleıasynyń tıimdiligin álem moıyndap, kóptegen elder bundaı ınstıtýttyń bolǵanyna múddelilik tanytyp otyr», - deıdi I. Hashımjanov.