Ulttyq biliktilik júıesi ne úshin qajet

NUR-SULTAN. QazAqparat –Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov ortalyq kommýnıkatsııalar qyzmetinde ótken brıfıngide Ulttyq biliktilik júıesi ne úshin engizilip jatqanyn túsindirdi, dep habarlaıdy QazAqparat tilshisi.

Onyń aıtýynsha, búgingi tańda eńbek naryǵy tehnologııalyq progresti jedeldetý, ekonomıkany tsıfrlandyrý sııaqty jahandyq trendterdiń yqpalymen ózgeristerge ushyrap, sonyń saldarynan jumys berýshilerdiń talaptary men bolashaq mamandardyń biliktiligi arasynda alshaqtyq qalyptasyp otyr. Osyǵan baılanysty qazaqstandyqtardyń kásibı bilimderin, daǵdylary men quzyretterin únemi jańartyp otyrý qajettigi týyndaǵan

«Ekonomıkalyq yntymaqtastyq jáne damý uıymynyń sarapshylary Qazaqstandaǵy eresek turǵyndardyń úzdiksiz bilim alýǵa az tartylǵanyn atap ótti. Máselen, 2018 jyly eresek halyqtyń tek 17%-y (16-65 jas) beıresmı oqytýǵa qatysqan. Bul rette áıelderdiń qatysý úlesi erlerge qaraǵanda joǵary (13,85 jáne 20%)», - deıdi mınıstrdiń birinshi orynbasary.

Aqmádı Sarbasovtyń aıtýyna qaraǵanda, buryn dástúrli joldarmen alynǵan bilimmen 10 jyl boıy biliktilikti arttyrmaı-aq jumys isteýge bolatyn. Al qazir kóptegen mamandyqtar boıynsha daǵdylardyń ózektiligi tek 2 jyl kóleminde ǵana saqtalady.

«Qazaqstanda jumyspen qamtylǵandardyń 4-5%-y ǵana jyl saıyn kásiptik oqýǵa nemese jalpy damytý kýrstaryna qatysady. Osy máselelerdi sheshý úshin bizdiń mınıstrlik Ulttyq biliktilik júıesin damytý boıynsha josparly jumys júrgizýde», – dedi vıtse-mınıstr.