Ulttyq banktiń altyn-valıýta rezervteri 35,7 mlrd AQSh dollaryna jetti

NUR-SULTAN. QazAqparat - Ulttyq banktiń altyn-valıýta rezervteri 35,7 mlrd AQSh dollaryna jetti. Búgin Úkimettiń keńeıtilgen quramdaǵy otyrysynda Ulttyq bank tóraǵasy Erbolat Dosaev osylaı málim etti, dep habarlaıdy QazAqparat tilshisi.

«Ulttyq banktiń altyn-valıýta rezervteri 2020 jyly 6,7 mlrd AQSh dollaryna ulǵaıyp, 35,7 mlrd AQSh dollaryna jetti. Altyn portfeli 4,7 mlrd AQSh dollaryna ósip, 2020 jyldyń sońynda 388 tonnany qurady», - dedi E. Dosaev.

Onyń aıtýynsha, altyn-valıýta rezervteriniń quramyndaǵy erkin konvertatsııalanatyn valıýtadaǵy aktıvter bir jyl ishinde 2 mlrd AQSh dollaryna ulǵaıyp, 12,1 mlrd AQSh dollaryna deıin ósti.

«Jalpy alǵanda, Ulttyq qordyń aktıvterin qosqanda, Qazaqstannyń halyqaralyq rezervteri 2020 jyly 3,6 mlrd AQSh dollaryna ulǵaıyp, 94,4 mlrd AQSh dollaryn qurady», - dedi UB basshysy.