Ulttyq bank jeltoqsanda valıýtalyq ınterventsııalar júrgizgen joq
QR Ulttyq banki baspasóz qyzmetiniń habarlaýynsha, saýda-sattyqtyń jalpy kólemi 2,95 mlrd AQSh dollaryn qurady. Bir aıda valıýta naryǵy suranys pen usynys turǵysynan teńgerimdi boldy, aıyrbastaý baǵamy naryq talaptaryna saı qalyptasty.
Kvazımemlekettik sektor sýbektileriniń valıýtalyq túsimdi satýy ótken aıdyń ishinde shamamen 328,7 mln AQSh dollaryn qurady. Kvazımemlekettik sektor kompanııalary valıýta naryǵynda satýdy ekinshi deńgeıli bankter arqyly óz betinshe júzege asyrady.
Jeltoqsanda Ulttyq qordan respýblıkalyq bıýdjetke transfertterdi qamtamasyz etý úshin 461 mln AQSh dollaryna valıýta satyldy. Ulttyq qordan satý kólemi saýda-sattyqtyń jalpy kóleminen 16% boldy nemese bir kúnde 31 mln AQSh dollarynan aspady. Ulttyq qordyń qarajatymen operatsııalar júrgizý kezinde Ulttyq bank naryqtyń beıtarap qaǵıdatyn saqtaıdy. Bul shetel valıýtasyn turaqty ári birkelki satý degendi bildiredi. Bul tájirıbe Ulttyq qor operatsııalarynyń valıýta naryǵyna áserin meıilinshe azaıtýǵa múmkindik beredi.
Zeınetaqy aktıvteriniń valıýtalyq úlesin qoldaý maqsatynda Ulttyq bank jeltoqsanda bırjalyq saýda-sattyqta shetel valıýtasyn satyp aldy, onyń jalpy somasy 43,2 mln AQSh dollaryn nemese naryqtyń jalpy kóleminen shamamen 1,5%-dy qurady.
Ulttyq bank jeltoqsanda valıýtalyq ınterventsııalar júrgizgen joq.
Transparenttilik qaǵıdaty aıasynda Ulttyq bank valıýta naryǵynda júrgiziletin barlyq operatsııa týraly tolyq aqparatty úzdiksiz jarııalaıdy.
«Qysqa merzimdi perspektıvada teńge dınamıkasy geosaıası jaǵdaıdyń ózgerýine, ishki qatysýshylardyń boljamdaryna jáne álemdik naryqtardaǵy jaǵdaıǵa baılanysty bolady. Ulttyq bank teńgerimsizdikterdiń jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady»,-delingen bank habarlamasynda.