Ulttyq bank zeınetaqy qory úshin $120 mln satyp aldy

ASTANA. QazAqparat - BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda Ulttyq bank qańtarda bırjalyq saýda-sattyqta shetel valıýtasyn satyp aldy, dep habarlaıdy QazAqparat qarjy retteýshisine silteme jasap.

Onyń jalpy somasy 120 mln AQSh dollaryn nemese naryqtyń jalpy kóleminen shamamen 5,8% qurady.

Ulttyq bank transparenttilik qaǵıdaty aıasynda valıýta naryǵynda júrgiziletin barlyq operatsııa týraly tolyq aqparatty jarııa etýin jalǵastyra beredi.

Qysqa merzimdi perspektıvada teńgeniń dınamıkasy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy jaǵdaıǵa baılanysty bolady.

Ulttyq bank teńgerimsizdiktiń jınaqtalýyna jol bermeıtin jáne altyn-valıýta rezerviniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.

Eske sala keteıik, munyń aldynda Ulttyq bank zeınetaqy aktıvterin basqarýdyń tıimsizdigi týraly synǵa jaýap bergen edi.