Ulttyq bank tóraǵasy teńge/rýbl baǵamynyń qalaı retteletinin túsindirdi

NUR-SULTAN. QazAqparat – Teńge men rýbldiń arasyndaǵy baǵam dollar baǵamyna qaraı retteledi. Bul eldiń altyn-valıýta qorynyń ortaımaýyna yqpal etedi. QR Ulttyq bankiniń resmı saıtynda jarııalanǵan suhbatta Ǵalymjan Pirmatov osyndaı paıym aıtty, dep habarlaıdy QazAqparat tilshisi.

«Teńgeniń Reseı rýbline qatysty aıyrbas baǵamy tikeleı qalyptaspaıdy, ol teńge men rýbldiń dollarǵa qatysty baǵamyna qaraı jekeleı qalyptasady. Teńge/rýbl naryǵy derbes qalyptasý úshin bizdiń memleketter arasyndaǵy saýda-sattyq teńesýi qajet. Al, qazir bizdiń Reseıden ákeletinimiz, Reseıge aparatynymyzdan áldeqaıda kóp jáne bizdiń taýar satýshylarymyz óz taýarlaryn Reseıge satqanda teńgege emes, valıýtaǵa satqandy tańdaıdy. Sondyqtan, teńgege degen suranys tómen.

Qubylmaly aıyrbas baǵamy saıasatyn ustaný – teńgerimsizdikterdiń jınaqtalýyn boldyrmaıdy jáne onymen qatar eldiń altyn-valıýta rezervterin saqtaýǵa múmkindik beredi. Sondyqtan, rýblmen nemese kez kelgen basqa valıýtamen parıtetke áser etý maqsatynda ulttyq valıýtanyń aıyrbas baǵamy boıynsha kez kelgen amaldar jasaýǵa jol berilmeıdi», - deıdi Ulttyq bank tóraǵasy.

Sondaı-aq, ol rýbldiń kenet nyǵaıýyna áser etken ishki-syrtqy faktorlarǵa toqtaldy.

«Maýsym aıynda rýbldiń baǵasy barlyq valıýtalarǵa, eń aldymen AQSh dollaryna qatysty aıtarlyqtaı nyǵaıdy. Osyndaı aıtarlyqtaı nyǵaıý Reseı Federatsııasynda engizilgen kapıtal qozǵalysyn shekteý sharalary, energııa resýrstaryn qosa alǵanda, negizgi eksporttyq taýarlardyń joǵary baǵalary aıasynda, ımporttyń aıtarlyqtaı qysqarýymen birge oryn aldy. Buryn engizilgen valıýtalyq shekteýlerdiń aıtarlyqtaı jeńildeýine qaramastan, Reseı rýbli munaı men gazdyń joǵary baǵasy men ımporttyń tómen kólemi aıasynda nyǵaıýyn jalǵastyrdy», - dedi Ǵalymjan Pirmatov.

Buǵan deıin QR Ulttyq bankiniń tóraǵasy bazalyq mósherlemeniń nege ózgerissiz qalǵanyn túsindirgen bolatyn .