Ulttyq bank tóraǵasy bazalyq mólsherlemeni 14 paıyz deńgeıinde saqtaýǵa qatysty pikir bildirdi

NUR-SULTAN. QazAqparat – Jyldyq mánde ınflıatsııa mamyrda 14 paıyzǵa jetti. Bul týraly elordadaǵy baspasóz máslıhatynda QR Ulttyq bankiniń tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Ulttyq banktiń Aqsha-kredıt saıasaty komıteti 2022 jylǵy 7 maýsymnan bastap bazalyq mólsherlemeni 14 paıyz deńgeıinde saqtaý jóninde sheshim qabyldady. Bizdiń sheshimimiz boljamdy raýndtyń nátıjesinde qabyldandy. Qazaqstandaǵy makroekonomıkalyq ahýaldyń budan keıingi damýyna qatysty boljamdy jańarttyq», - dedi Ǵ. Pirmatov.

Osy oraıda UB basshysy bazalyq mólsherleme boıynsha qabyldanǵan sheshimge negiz bolǵan faktorlardy túsindirdi.

«Naýryzdaǵy ózgeristen keıin aılyq ınflıatsııa sáýirde 2%-ǵa deıin jáne mamyrda 1,4%-ǵa deıin baıaýlady. Alaıda, ótken jylǵy kórsetkishterden, sol sııaqty, ádettegi óziniń ortasha jyldyq máninen aıtarlyqtaı asyp, joǵary qalpynda qaldy. Jyldyq mánde ınflıatsııa mamyrda 14%-ǵa jetti, bul rette barlyq quramdas bólikter boıynsha baǵanyń óskeni baıqaldy. Jyldyq mánde 19%-ǵa jetken azyq-túlik ónimderi baǵasynyń ósýi de eleýli úles qosty», - dedi Ǵ. Pirmatov.

Onyń sózine qaraǵanda, azyq-túlik ónimderine jatpaıtyn ınflıatsııa ımportty taýarlardyń qymbattaýyna baılanysty 11,9%-ǵa deıin qarqyn aldy. Retteletin kommýnaldyq qyzmetter baǵasynyń ósýine engizilgen moratorııdiń tejeýshi áserine qaramastan, aqyly qyzmetterdiń ınflıatsııasy 9,1%-ǵa deıin ósti.

Budan buryn habarlanǵandaı, bıyl sáýir aıynda Ulttyq bank bazalyq stavkany kóterý sebebin túsindirgen bolatyn.