Ulttyq bank: Teńge bir apta ishinde 0,4%-ǵa nyǵaıdy

ALMATY. QazAqparat – QR Ulttyq banki 2021 jyldyń 5 – 12 aqpan aralyǵynda jekelegen damýshy elderdiń valıýtalary boıynsha sholý jasady, dep habarlaıdy QazAqparat tilshisi.

Saýda-sattyqtyń qorytyndysy boıynsha 12 aqpanda teńgeniń naryqtyq baǵamy apta ishinde 0,4%-ǵa nyǵaıyp, bir AQSh dollary úshin 418,86 teńge boldy.

Syrtqy valıýta naryǵynda 2021 jylǵy 5 – 12 aqpan aralyǵyndaǵy kezeńde damýshy elder valıýtalarynyń serpini AQSh-ta yntalandyrý toptamasyn qabyldaý jáne koronavırýsqa qarsy vaktsınatsııany qamtýdy keńeıtý jónindegi kútýlerdiń nátıjesinde oń boldy.

Ulybrıtanııa Úkimeti elde Covid-19-dy juqtyrýdyń qysqarǵanyna senimdi ekenin bildirdi, 14 mln-nan astam adam alǵashqy ekpeni aldy. AQSh-ta shekteý sharalary jeńildetý josparlanǵan merzimnen buryn engizilýde. Federaldyq rezervtik júıeniń tóraǵasy Djerom Paýell qalpyna keltirýdi qoldaý úshin jeńildetilgen aqsha-kredıt saıasaty men qosymsha qarjylyq yntalandyrýdyń qajet ekenin taǵy da málimdedi.

Damýshy elder valıýtalarynyń AQSh dollaryna qatysty baǵamdarynyń serpini tómendegideı qalyptasty:

-Ońtústik Afrıka randy ınvestorlardyń táýekel dárejesiniń jaqsarýy, sondaı-aq el Prezıdenti jańartylatyn energııa kózderin damytý týraly jarııalaǵan joldaýy aıasynda 2%-ǵa (14,84-ten 14,55-ke deıin) nyǵaıdy

- Reseı rýbli munaı baǵasynyń ósýi aıasynda 1,4%-ǵa (74,65-ten 73,64-ke deıin) nyǵaıdy. RF OB negizgi mólsherlemeni 4,25% deńgeıinde saqtaý týraly sheshim qabyldady, sondaı-aq aqsha-kredıt saıasatyn jeńildetý tsıklin aıaqtaǵysy keletini týraly málimdedi;

- Meksıka pesosy AQSh dollary baǵamynyń jahandyq álsireýi aıasynda 0,7%-ǵa (20,09-dan 19,95-ke deıin) nyǵaıdy. Retteýshi ekonomıkany yntalandyrý maqsatynda turaqty ınflıatsııaǵa baılanysty mólsherlemeni 4%-ǵa deıin tómendetti;

- Túrik lırasy táýekel-sentımenttiń jaqsarýy aıasynda 0,4%-ǵa (7,06-dan 7,03-ke deıin) nyǵaıdy. Aıyrbas baǵamynyń nyǵaıý serpinine baılanysty shetel valıýtasynda qorlandyrý quny aıtarlyqtaı tómendedi, kredıtorlar azannan bastap shamamen $2 mlrd tartty;

Úndi rýpııasy 0,2%-ǵa (72,93-ten 72,76-ǵa deıin) nyǵaıdy. Úkimet aıqyndylyqty arttyrý maqsatynda 2020 jylǵy rekordtyq 9,5% bıýdjet tapshylyǵy týraly jáne 2021 jylǵy 6,8% bolatyny týraly boljamyn habarlady.

Buryn kvazımemlekettik sektordan qaryz alý boıynsha bıýdjettiń balanstan tys baptaryn engizý esebinen kórsetkishter tómen boldy;

-Brazılııa realy apta ishinde ózgergen joq, 5,38 deńgeıinde qaldy.