Ulttyq bank teńge baǵamynyń qubylmalyǵyn shekteý sharalaryn júrgizýde

NUR-SULTAN. QazAqparat – QR Ulttyq banki teńgeniń aıyrbas baǵamynyń kúrt aýytqýyn shekteý sharalaryn júrgizip jatyr. Bul týraly QR Ulttyq banki tóraǵasynyń orynbasary Vıtalıı Týtýshkın Parlamentte respýblıkalyq bıýdjetti talqylaý kezinde aıtty, dep habarlaıdy QazAqparat tilshisi.

«Ulttyq bank aıyrbas baǵamynyń kúrt aýytqýyn jáne onyń keıinnen ınflıatsııaǵa kóshýin shekteý sharalaryn qolǵa aldy. Keı kúnderi valıýtalyq ınterventsııalar júrgizdi. Júrgiziletin operatsııalar týraly aqparat ýaqytynda jarııalanyp otyr», - dedi V. Týtýshkın Májilistiń jalpy otyrysynda.

Onyń aıtýynsha, kvazımemlekettik sektor sýbektileriniń valıýtany satý kólemin ulǵaıtý maqsatynda olardyń valıýtalyq túsimdi mindetti satý mólsheri 75%-ǵa deıin ulǵaıdy.

Inflıatsııaǵa qarsy saıasatty kúsheıtý úshin Úkimet Ulttyq bankpen birge bıylǵy aqpannan bastap «2022-2024 jyldarǵa arnalǵan ınflıatsııa deńgeıin baqylaý jáne tómendetý jónindegi jańartylǵan sharalar keshenin» iske asyryp keledi.

«Geosaıası jaǵdaıdyń nasharlaýyna baılanysty jahandyq qarjy, taýar naryqtarynda buryn-sońdy bolmaǵan ózgerister aıasynda teńgeniń aıyrbas baǵamy bıyl 15 naýryzdaǵy saýda-sattyq qorytyndysy boıynsha eń joǵary deńgeıde 512,17 teńgege deıin álsiredi, biraq 19 sáýirge qaraı 443,85 teńgege deıin nyǵaıyp, shyǵynnyń qomaqty bóligin japty», - dedi Ulttyq bank ókili.

Buǵan deıin V. Týtýshkın Qazaqstan úshin syrtqy ınflıatsııalyq jaǵdaı kúrdeli bolatynyn boljaǵan edi.

Sonymen birge, Qazaqstanda ınflıatsııa taǵy ósedi dep boljanyp otyr.