Ulttyq bank tamyzda bazalyq mólsherlemeni tómendetý múmkindigin qarastyrady
«Eldegi ınflıatsııalyq úderisterde baıqalǵan jáne kútiletin oń ózgeristerge qaramastan, ınflıatsııa tómendeýiniń senimdi turaqty úrdisi týraly aıtýǵa áli erte. Bul ishki ınflıatsııalyq faktorlardyń jáne bolashaqta baǵa ósýi úshin yqtımal táýekelderdiń bolýyna baılanysty. Inflıatsııalyq kútýlerdiń joǵary deńgeıde ornyǵýyn, janar-jaǵarmaı men turǵyn úı kommýnaldyq qyzmetter baǵasynyń artýynan bolǵan janama áserlerdiń iske asýyn, fıskaldyq yntalandyrýdyń kúsheıýin, munaı suranysyna áser etetin jahandyq retsessııanyń bolý múmkindigin jáne geosaıası jaǵdaı belgisizdiginiń ósýin negizgi táýekelderge jatqyzýǵa bolady. Biz buryn aıtylǵan rıtorıkaǵa sáıkes áreket etemiz», - dedi Ǵalymjan Pirmatov.
Onyń aıtýynsha, joǵaryda atalǵan faktorlar men táýekelder aqsha-kredıt saıasatyn baıqap iske asyrýdy qajet etedi. Bazalyq mólsherlemeniń aǵymdaǵy deńgeıi turaqty ınflıatsııany baıaýlatý úderisin qoldaýǵa, memlekettik shyǵystardyń ósýin teńgerýge jáne ınflıatsııalyq kútýlerdiń joǵary deńgeıde turaqtap qalýynyń aldyn alýǵa múmkindik beredi.
«Inflıatsııanyń tómendeýi bazalyq mólsherlemeniń tómendeýine múmkindik týǵyza bastaǵanyn kórip otyrmyz. Kelesi sheshim boljamdardy jańartýmen jáne jańa derekterdi taldaýmen qatar qabyldanatyn bolady. Osyǵan baılanysty biz tamyz aıynda bazalyq mólsherlemeni tómendetý múmkindigin qarastyratyn bolamyz. Bizdiń barlyq is-áreketimiz keleshekte ınflıatsııa boıynsha belgilengen 5 paıyz maqsatyna birtindep qol jetkizýge baǵyttalǵan», - dedi Ulttyq bank tóraǵasy.