Ulttyq bank RBK bankine qatysty máseleni aıdyń aıaǵyna deıin qaraıtyn bolady

ASTANA. QazAqparat -  QR Ulttyq banki tóraǵasynyń orynbasary Alpysbaı Ahmetov Parlament Senatynyń otyrysynda RBK bankine qatysty týyndap jatqan másele týrasynda pikir bildirdi, dep habarlaıdy «QazAqparat» HAA tilshisi. 

«Qazirgi ýaqytta biz RBK-daǵy ózekti máseleni bilemiz. Ulttyq bank búgingi kúni atalǵan banktiń aktsıonerine jaǵdaıdy retke keltirip, mindettemelerdi oryndaý baǵytynda naqty tapsyrmalar berdi», - deıdi Alpysbaı Ahmetov.

Onyń aıtýynsha, Ulttyq bank bul máseleni jiti bilip otyr. Alaıda onyń sheshimi tabý reti áli de kelissóz satysynda.

«Qazirgi ýaqytta iri nesıe berýshilermen jumys atqaryp jatyrmyz. RBK klıentterinde qıyndyq týyp jatqanynan habardarmyz. Kúni keshe ǵana teledıdardan stýdentterdiń shákirtaqysyn ala almaı júrgeni týraly kórsetti. Osy aıdyń sońyna deıin biz máseleni qaraıtyn bolamyz. Atalǵan bank qazirgi ýaqytta bankterdiń jumysyn retteý baǵdarlamasy boıynsha kómek berý týraly ótinish berip otyr. Bankterdiń retteý baǵdarlamasy barlyq bankterge ońdy-soldy aqsha bere berýge bolady degendi bildirmeıdi», - deıdi ol.
 

Sonymen birge, Ahmetov Ulttyq bank RBK bankine kómek bere me, joq pa  ol sharýa áli sheshilmegenin jetkizdi.

 «Olar (RBK - avt) ózderiniń bıznes-modelderin usynýy tıis. Al sheshimdi jalǵyz Ulttyq banktiń tóraǵasy ǵana emes, basqarma qabyldaıtyn bolady. Ol basqarmanyń quramyna vıtse-premer Dosaev, Prezıdenttiń kómekshisi Smaıylov jáne qarjy mınıstri kiredi. Atalǵan másele basqarmada qaralatyn bolady», - deıdi Alpysbaı Ahmetov.