Ulttyq bank Qazaq Banki men Eksımbank salymshylaryna úndeý joldady
Ulttyq banktiń málimdeýinshe, eger sot «Qazaq Banki» men «Eksımbank» bankterin májbúrlep taratý týraly sheshim qabyldasa, QDKQ salymshylarǵa kepildendirilgen ótemaqy tóleıdi. Kepildik ótemaqynyń shekti mólsheri: teńgedegi depozıtter úshin - 10 mln teńgege deıin; shetel valıýtasyndaǵy depozıtter boıynsha - 5 mln teńgege deıin belgilengen.
Banktiń klıentteri bolyp sanalatyn jeke tulǵalar, jeke kásipkerler, jeke sot oryndaýshylar, notarıýstar jáne zańgerler depozıtterge kepildik berý qorynan ótemaqy alýǵa quqyly.
Qarjylyq retteýshi Ulttyq banktiń pikirinshe, banktik shottaǵy qarajattyń qaldyǵy ótemaqy arqyly beriledi. Al bank bólgen syıaqyǵa kepildik berilmeıdi. Eger bank salymy shartynda syıaqyny kapıtaldandyrý qarastyrylǵan bolsa, kapıtalǵa aınalǵan syıaqy depozıttiń negizgi somasyna qosylady jáne kepildik nysanyna aınalady.
«Qazaq Banki» qorynda jeke tulǵalardyń 23 mlrd teńge kóleminde depozıtteri bar. Qazaqstannyń depozıtterge kepildik berý qory ótemaqy retinde 19,6 mlrd teńge tóleıdi. Bank klıentteriniń shamamen 2%-inde kepildik berilgen somadan asatyn depozıtteri bar jáne QDKQ joǵaryda kórsetilgen shekti soma boıynsha ótemaqy tóleıdi, al odan asyp ketken somany taratý komıssııasy arqyly alýǵa bolady.
«Eksımbank Qazaqstan» AQ-da jeke tulǵalardyń 254 mıllıon teńge bolatyn depozıtteri bar. Onyń ishinde Qazaqstannyń depozıtterge kepildik berý qorynyń ótemaqy tóleý boıynsha mindettemeleri 249 mıllıon teńgeni quraıdy. Bank klıentteriniń shamamen 1%-inde kepildik berilgen somadan artyq depozıtteri bar jáne QDKQ joǵaryda kórsetilgen shekti soma boıynsha ótemaqy tóleıdi, odan asyp ketken somany taratý komıssııasynan alýǵa bolady.