Ulttyq bank otandyq kólikti avtokredıtteý baǵdarlamasyna 20 mlrd teńge bóldi

ALMATY. QazAqparat - Ulttyq bank otandyq avtoónerkásipke qoldaý kórsetý úshin avtokredıtteý baǵdarlamasyna 20 mlrd teńge bóldi, dep habarlaıdy QazAqparat.

Ulttyq bank baspasóz qyzmetiniń málimetinshe, otandyq óndiristegi jeńil avtokólikti satyp alýshylardy kredıtteý baǵdarlamasynda (Ulttyq bank basqarmasynyń 2019 jylǵy 31 mamyrdaǵy № 79 qaýlysymen bekitilgen) jyl saıyn 5 jyl ishinde (2019 – 2023 jyldar aralyǵynda) 20 mlrd teńgege deıin bólý kózdelgen.

Bul baǵdarlama sheńberinde bıyl «Qazaqstannyń Damý banki» AQ (QDB) 20 mlrd teńge somaǵa qarjylandyrý aldy. Alynǵan qarajatty QDB ekinshi deńgeıdegi bankterge jeke tulǵalardy – otandyq óndiristegi jeńil avtokólikti satyp alýshylardy kredıtteý úshin jiberedi.

«Sonymen birge Ulttyq banktiń baǵdarlamasy boıynsha avtokredıtteýdiń jeńildik talaptary saqtalǵanyn atap ótken mańyzdy. Máselen, syıaqynyń nomınaldy mólsherlemesi jyldyq 4%-dan aspaıdy (jyldyq tıimdi syıaqy mólsherlemesi – 7,5%-ǵa deıin), kredıtteý merzimi – 7 jyldan aspaıdy. Otandyq avtomobıldiń quny 15 mln teńgeden aspaýǵa tıis», delingen habarlamada.