Ulttyq bank ókili dollar baǵamyna boljam jasady

NUR-SULTAN. QazAqparat – AQSh dollary baǵamynyń qarqyny Federaldy rezerv júıesiniń málimdemesine oraı ózgeredi. Bul týraly Ulttyq bank tóraǵasynyń orynbasary Álııa Moldabekova aıtty, dep habarlaıdy QazAqparat tilshisi.

«AQSh dollary men eýronyń baǵamyna birqatar faktor yqpal etetini túsinkti. Olardyń arasynda negizgisi Federaldy rezerv júıesiniń (FRJ) saıasatyna qatysty. Buǵan deıin birneshe ret AQSh-tyń Federaldy rezerv júıesi ınflıatsııamen kúres aıasynda bazalyq mólsherlemeni ary qaraı kóteretini jaıynda málimdegen edi. Bul óz kezeginde valıýta naryǵyndaǵy ahýalǵa aıtarlyqtaı áser etip otyr», - dedi Á. Moldabekova elordada ótken baspasóz máslıhatynda.

Onyń aıtýynsha, FRJ mólsherlemesiniń artýy dollardyń nyǵaıýyna alyp keledi. Bul turǵyda damyǵan jáne damýshy elderdiń valıýtalary, sonyń arasynda eýro baǵamy qubylmaly bolady. Sonyń saldarynan bul valıýtalar dollarǵa qaraǵanda álsirep otyr.

«AQSh dollary, eýro jáne basqa da valıýtalar baǵamynyń aldaǵy qarqyny Federaldy rezerv júıesiniń málimdemesine, sondaı-aq paıyz mólsherlemesin kóterý qarqynyna oraı ózgeredi», - dedi UB basshysynyń orynbasary.

Federaldy rezerv júıesi qatań monetarly saıasatty ustanyp otyrǵanyna toqtalǵan ol: «Sondyqtan naryqqa qatysýshylardyń kóbisi AQSh dollary ary qaraı nyǵaıa túsedi degen boljam aıtyp otyr», - dedi.