Ulttyq bank Qazaqstannyń syrtqy qaryzy jaıly málimetterdi jarııalady

ASTANA. QazAqparat - Qazaqstan Respýblıkasynyń syrtqy boryshy 2017 jylǵy 1 qazandaǵy jaǵdaı boıynsha, sońǵy 10 jylda 74,6 mlrd. AQSh dollaryna ulǵaıyp, 168,9 mlrd dollardy qurady, dep habarlaıdy «QazAqparat» HAA QR Ulttyq bankiniń baspasóz qyzmetine silteme jasap. 

«Syrtqy boryshtyń ósýi, negizinen, el aýmaǵyndaǵy sheteldik kompanııalar fılıaldarynyń munaı-gaz jobalary aıasyndaǵy 76,7 mlrd. AQSh dollary mólsherindegi fırmaaralyq bereshektiń ulǵaıýy esebinen boldy. Sonymen qatar eýrooblıgatsııalar shyǵarý jáne kredıtter men qaryzdardy tartýǵa baılanysty ekonomıkanyń qarjylyq emes sektorynyń 26,2 mlrd AQSh dollaryna jáne Úkimettiń syrtqy boryshynyń 10,8 mlrd AQSh dollaryna ulǵaıýy baıqaldy», - delingen habarlamada.

Ulttyq Banktiń syrtqy mindettemeleri eldiń syrtqy boryshy kóleminiń ortasha alǵanda 0,6%-yn quraı otyryp, is júzinde ózgergen joq.

Qarjy sektorynyń syrtqy bereshegi, negizinen, bank sektorynyń («Qazaqstannyń Damý Banki» AQ-ty qosa alǵanda) kredıtter jáne qaryzdar boıynsha beresheginiń 37,4 mlrd AQSh dollaryna azaıýy esebinen 39,1 mlrd AQSh dollaryna qysqardy. Bul qysqarý eń tómengi rezervtik talaptar tetiginiń, prýdentsııalyq normatıvterdiń qoldanylýynyń, jetkilikti kapıtaldandyrý qaǵıdalarynyń arqasynda da boldy.

Syrtqy boryshtyń ІJÓ-ge qatynasy 3,5%-ǵa jaqsaryp, 108,9% boldy. Sonyń 62%-y fırmaaralyq bereshekke, 26%-y «Basqa sektorlarmen» baılanysty emes kredıtorlar aldyndaǵy syrtqy boryshyna, 8%-y memlekettik syrtqy boryshqa (Úkimet pen Ulttyq Bank), 4%-y «Bankter» sektorynyń (EDB jáne «Qazaqstannyń Damý banki» AQ) syrtqy mindettemelerine tıesili.

2017 jylǵy 3-toqsanda eldiń syrtqy boryshy, «KazTransGaz» AQ-tyń eýrooblıgatsııalardyń 10 jyldyq shyǵarylymyn 750 mln. AQSh dollaryna teń jalpy nomınaldyq kólemmen ornalastyrý, rezıdentterdiń kommertsııalyq kredıtter boıynsha bereshegin 204,8 mln AQSh dollaryna ulǵaıtý, eýrooblıgatsııalardyń qoldanystaǵy shyǵarylymdary boıynsha kýpondyq syıaqy esepteý (185,7 mln AQSh dollary) esebinen 1 mlrd AQSh dollaryna ósti.

Aıta keteıik, memleket baqylaıtyn uıymdardyń syrtqy boryshy 2017 jylǵy 1 qazandaǵy jaǵdaı boıynsha 26,4 mlrd AQSh dollaryn quraǵan.