Ulttyq bank qarjy monıtorıngi sharalaryn kúsheıtti

NUR-SULTAN. QazAqparat - Qazaqstan 2022 jyly qylmystyq kiristerdi jylystatýǵa jáne terrorızmdi qarjylandyrýǵa qarsy is-qımyldyń halyqaralyq standarttaryna el zańnamasynyń tehnıkalyq sáıkestigin, sondaı-aq qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq top (EAT) sheńberinde KJ/TQQ ulttyq júıesiniń tıimdiligin ózara baǵalaýǵa daıyndyq boıynsha alǵa qoıǵan jumystardy belsendi júrgizýde. Bul týraly QazAqparat QR Ulttyq banki baspasóz qyzmetine silteme jasap habarlaıdy.

Júrgiziletin jumystar sheńberinde, sondaı-aq FATF halyqaralyq standarttaryna sáıkes kelý maqsatynda QR Ulttyq Banki, QR Qarjy monıtorıngi agenttigi jáne QR Qarjy naryǵyn retteý jáne damytý agenttigi zańsyz transshekaralyq qarjy operatsııalaryn boldyrmaý jáne aqshany jylystatýǵa qarsy is-qımyl maqsatynda qarjy monıtorıngi sharalaryn kúsheıtý boıynsha birlesken buıryq qabyldady.

Qylmystyq kiristerdi zańdastyrý men terrorızmdi qarjylandyrýdyń tıpologııalary, shemalary men tásilderi jáne qarjy uıymdarynyń qarjy monıtorıngin júrgizý sheńberinde kúsheıtilgen baqylaý retinde qaralýy tıis operatsııalardyń tizbesi jáne olardy júrgizý kezinde ekinshi deńgeıdegi bankterge arnalǵan is-qımyl tártibi ázirlendi.

Álemdik ozyq tájirıbege sáıkes, bankter qarjy monıtorıngi sýbektileri retinde KYC (óz klıentińdi bil) qaǵıdattary sheńberinde táýekeli joǵary operatsııalardy egjeı-tegjeıli zerdeleý boıynsha óz jumysyn kúsheıtedi.

Bul sharalar kapıtaldyń zańsyz aǵyndaryna qarsy áreket etýge baǵyttalǵan jáne transshekaralyq operatsııalardyń aıqyndylyǵyn arttyrady.