Ulttyq bank «Qarapaıym zattar ekonomıkasy» men «7-20-25» baǵdarlamalaryn jalǵastyrady

NUR-SULTAN. QazAqparat – QR Ulttyq bankiniń tóraǵasy Erbolat Dosaev Qazaqstan qarjygerleriniń IX kongresinde ekonomıkany qoldaý baǵdarlamalaryn iske asyrý jumystary týraly aıtyp berdi, dep habarlaıdy QazAqparat.

«Ulttyq bank ekonomıkanyń neǵurlym zardap shekken salalarynda kásipkerlerdi qoldaý maqsatynda Kásipkerlik sýbektilerin jeńildikpen kredıtteý baǵdarlamasyn qarjylandyra bastady. Baǵdarlamany iske asyrý kezinde 1,5 myńnan astam kásipkerlik sýbektileri 1,1 trln teńge somada qaryz aldy. Kórip otyrǵandaı, búgingi kúni ekonomıkanyń shamamen barlyq sektorlary ósý aımaǵynda tur, osyǵan baılanysty baǵdarlama osy jylǵy 31 jeltoqsanǵa deıin aıaqtalady», - dedi E. Dosaev.

Onyń aıtýynsha, halyqty jumyspen qamtamasyz etip, jumyssyzdyqtyń ósýine jol bermeý maqsatynda Ulttyq bank qaıtarymdy negizde jergilikti atqarýshy organdardy qarjylandyrý arqyly 900 mlrd teńge bolatyn Jumyspen qamtýdyń jol kartasyn iske asyrýǵa qatysty. Bul baǵdarlama da bıyl aıaqtalady.

«Uzaq merzimdi turǵyn úıdi kredıtteýdi yntalandyrý úshin bastalǵan «Baspana hıt» naryqtyq ıpotekalyq ónimi de bıyl aıaqtalady. Búginde osy baǵdarlamaǵa bólingen 600 mlrd jýyq teńge tolyq ıgerildi», - dep atap ótti spıker.

Sondaı-aq, Memleket basshysynyń tapsyrmasymen Ulttyq bank 2022 jyly «Qarapaıym zattar ekonomıkasy» baǵdarlamasyn jáne 7-20-25 jeńildigi bar ıpoteka baǵdarlamasyn iske asyrýdy jalǵastyrady.

«Qazirgi kezde «Qarapaıym zattar ekonomıkasy» aıasynda 940 mlrd teńgege qaryz berildi, «7-20-25» baǵdarlamasy boıynsha 1 trln teńgeden 400 mlrd teńgeden astam soma bólindi», - dedi Erbolat Dosaev.