Ulttyq bank ıpotekalyq nesıe boıynsha bankterge komıssııa alýǵa tyıym saldy
Bul komıssııalar tizbesin ońtaılandyrý úshin jáne nesıe alý jáne oǵan qyzmet kórsetý kezinde qaryz alýshylardyń shyǵystaryn qysqartý sheńberinde jasalyp otyr.
Ulttyq banktiń bastamasy boıynsha 2018 jylǵy 16 shildeden bastap «Bankter týraly» zańǵa ıpotekalyq nesıe berýge jáne oǵan qyzmet kórsetýge baılanysty bank shotyn júrgizgeni úshin bankterdiń komıssııalar belgileýine jáne alýyna tyıym saldy.
Sondaı-aq, zańnyń normasy qoldanysqa engizilgennen keıin 2018-jyldyń 16-shildesinen keıin jeke tulǵalarmen jasasqan ıpotekalyq nesıe sharttary boıynsha bank shotyna qaryzdy esepke alýǵa tyıym salý engizildi.
«Osyndaı norma qazirgi kezde QR Parlamenti Májilisiniń qaraýyndaǵy «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý jáne tórelik máseleleri boıynsha ózgerister men tolyqtyrýlar engizý týraly» zań jobasynda qamtylǵan. Kásipkerlik qyzmetpen baılanysty emes barlyq jeke tulǵalarǵa qatysty qaryz berýge jáne oǵan qyzmet kórsetýge baılanysty bank shotyn júrgizgeni úshin bankter komıssııa almaıdy», - delingen Ulttyq bank habarlamasynda.
Ulttyq bank 2016 jylǵy 30 mamyrda jyldyq tıimdi syıaqy mólsherlemesin esepteý kezinde eskeriletin, jeke tulǵaǵa berilgen banktik qaryz jáne shaǵyn nesıe berýge jáne olarǵa qyzmet kórsetýge baılanysty komıssııalar men ózge de tólemderdiń tizbesin bekitken bolatyn.
Komıssııalar tizbesi bankter óndirip alatyn komıssııalar sanyn aıtarlyqtaı qysqartýǵa jáne olardy ataýlary men maǵynalyq mánderi boıynsha biregeılendirýge múmkindik berdi.
Atalǵan tizbek 2016 jyldyń 1-shildesinen bastap qoldanysqa engizilgen bolatyn.
Bul rette, jeke tulǵalarmen 2016 jylǵy 1 shildege deıin jasalǵan banktik qaryz sharttary boıynsha bankter, bankter týraly zańnyń 39-babyna sáıkes, banktik qaryz shartynda kórsetilgen jáne Operatsııalar júrgizýdiń jalpy talaptary týraly qaǵıdalarda belgilengen komıssııalardy alýǵa quqyly.