Ulttyq bank halyqtyń quqyǵyn buzǵan bankterdi atady
UB baspasóz qyzmetinen habarlaǵandaı, qarjy regýlıatory halyqtyń quqyqtary men zańdy múddelerin buzý boıynsha 2018 jyldyń úshinshi toqsanynda ekinshi deńgeıli bankterdiń jáne bank operatsııalarynyń jekelegen túrlerin júzege asyratyn uıymdardyń jumysyna taldaý júrgizgen.
«Tekserý barysynda anyqtalǵan buzýshylyqtardyń qorytyndysy boıynsha ekinshi deńgeıli bankterge qatysty 71 sanktsııa jáne shekteý sharasy qoldanyldy. Onyń ishinde, aıyppuldar salý jáne óndirip alý túrinde 28 sanktsııa, jazbasha uıǵarym túrindegi 43 shekteý sharasy qabyldandy», - delingen habarlamada.
Ulttyq bank eń kóp buzýshylyqqa jol bergen 6 bankti atady.
«Lıtsenzııalary keri qaıtarylǵan bankterden («Qazaq Banki» AQ, «Astana banki» AQ) bólek, qarjylyq qyzmetterdi tutynýshylardyń ótinishteri men shaǵymdaryn qaraý nátıjeleri boıynsha mynadaı bankter eń kóp buzýshylyqqa jol bergen. Olar: «Kazkommertsbank» AQ, «ForteBank» AQ, «Hoým Kredıt Banki» AQ EB, sondaı-aq «Alfa-Bank» AQ EB, «ATF Bank» AQ, «Sberbank Rossıı» AQ EB», - dep habarlady vedomstvonyń baspasóz qyzmetinen.
Atap ótilgendeı, bankter kóp jaǵdaıda QR banktik zańnamasynda, sondaı-aq Ulttyq banktiń normatıvterinde belgilengen talaptardy saqtamaǵan. Naqtyraq aıtqanda, banktik qaryzdarǵa qyzmet kórsetýde, tólemder men aqsha aýdarymdaryn jasaýda, bank shottary boıynsha qyzmet kórsetýde quqyqtar buzylǵan. Buǵan qosa, tekserý nátıjesi tutynýshylardyń múddesin qorǵaý máseleleri boıynsha bankterdiń talaptardy eskere bermeıtinin kórsetip otyr.
«Bank qaryzy boıynsha qyzmet kórsetý tártibinde kelesi kemshilikter anyqtalǵan. Naqtyraq aıtqanda, qaryz alýshyǵa bereshek merziminiń ótip ketkeni týraly habarlamaý, nesıe beresheginiń bary týraly anyqtamanyń berilgeni úshin komıssııany zańsyz alý, qaryz somasyn qaıtarý boıynsha mindettemelerdi oryndamaǵany úshin turaqsyzdyq aıyby (aıyppul, ósimpul) mólsherin arttyrý, kredıttik bıýroǵa qaryz alýshy jóninde dáıeksiz málimet berý sekildi olqylyqtarǵa jol bergen», - dedi UB baspasóz qyzmetinen.