Ulttyq bank bırja saýdasynda paıda bolǵan alaıaqtar týraly eskertti
«Qazaqstan Respýblıkasynyń Ulttyq banki ózin ınvestıtsııalyq qyzmetpen aınalysatyn kompanııa retinde tanystyratyn alaıaq toptardyń kóbeıgenin eskertedi. Mundaı toptar bırja saýdasynda tez aqsha tabýdyń qarapaıym tásilderin sıpattaıtyn jarnamalyq rolıkterge toly saıttar men mobıldik qosymshalardy jasaıdy. Alaıda, olar sıpattaıtyn qarjylyq damýǵa qatysty baǵdarlama shyn máninde joq.
Mundaı resýrstar áleýmettik jelilerde, sonyń ishinde YouTube vıdeohostınginde jarnama arqyly belsendi túrde nasıhattalyp júr.
Alaıaqtyq negizge qurylǵan mundaı saıttarda tanymal tulǵalardyń atynan jalǵan aqparat, qoldan jasalǵan lıtsenzııalar men basqa da quqyq belgileýshi qujattar bolady. Adamnyń áserin kúsheıtip, paıdalanýshynyń senimin arttyrý úshin mundaı resýrstar ınvestıtsııadan túsetin boljamdy paıdanyń kalkýlıatoryn da ornalastyryp qoıady», - delingen aqparatta.
Mysaly, keıbir anyqtalǵan alaıaqtyq shemalarda bırjalyq saýdada aqsha tabý úshin saıtta tirkelý kezinde aqshalaı salymdy talap etedi. Osydan keıin alaıaqtar óz qurbanyna saýda shoty ashylǵany týraly Ulttyq banktiń atynan sertıfıkat jiberedi. Ol sertıfıkatta Ulttyq banktiń logotıpi, jalǵan qoıylǵan qoldar men mórdiń sýreti jáne Ulttyq banktiń jalǵan qyzmetkerleri týraly aqparat bolady.
«Atalǵandardy eskere otyryp, Ulttyq bank mundaı resýrstarda alaıaqtyq áreketterdiń aıqyn belgileri bar ekenin málimdeıdi, sebebi:
· Ulttyq bank jeke tulǵalardyń shotyna qyzmet kórsetpeıdi, aqshalaı esep aıyrysý men mámileler júrgizbeıdi;
· Ulttyq bank memlekettik qorlardan tabys tabý úshin qandaı da bir platformalardy ázirleýge qatyspaıdy;
· resýrstarda qysqa ýaqyt ishinde joǵary paıdaǵa jalǵan kepil beretin aqparat qamtylady, sondaı-aq baılanys deregi joq;
· alaıaqtar beıresmı nómirlerden belsendi túrde qońyraý shalyp, jalǵan quqyq belgileıtin qujattardy usynady;
· is júzinde aktıvterdi ınvestıtsııalyq basqarýǵa lıtsenzııasy bar uıymdardyń tizbesi Qazaqstan Respýblıkasy Qarjy naryǵyn retteý jáne damytý agenttiginiń resmı saıtynda jarııalanǵan», - delingen UB málimetinde.
Keńes alý úshin 1477 qysqa nómiri boıynsha Ulttyq banktiń Baılanys ortalyǵyna habarlasýǵa bolady.