Ulttyq bank bazalyq mólsherlemeni ózgerissiz qaldyrdy

ALMATY. QazAqparat – QR Ulttyq Banki bazalyq mólsherlemeni jáne paıyzdyq dálizdi +/- 1 p.t. jyldyq 9,25% deńgeıinde saqtaý týraly sheshim qabyldady, dep habarlaıdy QazAqparat tilshisi.

«Inflıatsııa 4-6% nysanaly dáliz sheginde saqtalady. 2020 jylǵy qańtarda jyldyq ınflıatsııa 5,6% boldy. Azyq-túlik taýarlar - 9,2%-ǵa, azyq-túlikke jatpaıtyn taýarlar – 5,2%-ǵa, aqyly qyzmetter – 1,4%-ǵa qymbattady», - dedi Ulttyq banktiń baspasóz qyzmeti.

Tutynýshylyq jáne ınvestıtsııalyq suranys ekonomıkalyq belsendilikti arttyrýǵa yqpal etedi. Halyqtyń naqty aqshalaı kirisiniń ósýi 2019 jylǵy qańtar – qarashada 5,8% boldy. Áleýmettik qoldaýǵa arnalǵan bıýdjet shyǵystary 2019 jyly 26,0%-ǵa ulǵaıdy.

Tutynýshylyq kredıtteý 2019 jyly 26,9%-ǵa ósti. 2019 jyly ınvestıtsııanyń keńeıýi 8,5% boldy.

2019 jyldyń qorytyndysy boıynsha qysqa merzimdi ekonomıkalyq ındıkator 5,0%-ǵa ósti.

Álemdik naryqta 2020 jylǵy qańtarda munaıdyń ortasha baǵasy bir barrel úshin 63,7 AQSh dollary boldy, azyq-túlik baǵasynyń FAO ındeksi 2019 jylǵy jeltoqsanda 2,5%-ǵa ósti.

Reseıdegi jyldyq ınflıatsııa - 3%, EO elderinde – 1,6% boldy, bul ımporttalatyn taýarlar baǵasynyń ósýin shekteıdi.

Proınflıatsııalyq táýekelder benzındi satýǵa aktsızderdiń joǵarylaý jáne retteletin qyzmetterdiń qymbattaý áserinen qysqa merzimdi keleshekte baıqalatyn bolady.

Aǵymdaǵy jyldyń sońyna deıin jáne orta merzimdi bolashaqta ınflıatsııalyq protsester birtindep álsireı bastaıdy jáne jyldyq ınflıatsııa nysanaly dálizdiń orta deńgeıi 4-6%-ke jáne 2020 jyldyń sońyna deıin odan da tómen deńgeıge deıin baıaýlaıdy.

Bazalyq mólsherleme boıynsha kezekti sheshim 2020 jylǵy 16 naýryzda Nur-Sultan qalasynyń ýaqytymen saǵat 15:00-de jarııalanady.

Eske salsaq, ótken jyly jeltoqsan aıynda QR Ulttyq banki bazalyq mólsherlemeni jyldyq 9,25% deńgeıde saqtaý týraly sheshim qabyldaǵan bolatyn.