Ulttyq bank basshysy kredıt alatyndarǵa keńes berdi

ASTANA QazAqparat –Ulttyq bank tóraǵasy Ǵalymjan Pirmatov halyqqa jańa nesıe alar kezde muqııat oılanýǵa keńes berdi, dep habarlaıdy QazAqparat tilshisi.

Bazalyq mólsherlemeniń kólemine arnalǵan brıfıngide Ulttyq bank tóraǵasyna nesıelerdiń paıyzy ósip jatqany týraly suraq qoıyldy.

Ǵalymjan Pirmatov bizdiń ekonomıkanyń jaǵdaıynda bul zańdylyq únemi oryndala bermeıtinin eske saldy.

«Bazalyq mólsherleme týraly sheshim qabyldaǵan kezde biz búkil derekter men táýekelderdi tyńǵylyqty saraptaımyz. Árıne, biz bazalyq mólsherlemeni kóterý nesıeniń paıyzdyq mólsherlemelerin kóterip ketetinin túsinemiz. Biraq bizdiń jaǵdaıda, bizdiń ekonomıkany eskersek, mundaı yqtımaldyq keıde sáıkespeı jatady. Birinshiden, nesıe berý derekterinen kredıtke degen suranys bar ekenin kórip otyrmyz. Biz kelip túsken derekterden tutyný nesıeleri de ósip jatqanyn kórip otyrmyz. Ekinshi deńgeıdegi bankter túrli sıpattaǵy atsııalar ótkizip jatyr. Paıyzdyq móshlerlemesi 0 paıyz, bólip tóleýge bolatyn baǵdarlamalar óte tanymal bolyp aldy. Sondyqtan byltyr da, bıyl da bizdiń sheshimder nesıelerdiń paıyzdyq mólsherlemesin kóterilip ketpegenin kórip otyrmyz», - dedi ol.

Onyń málimetine qaraǵanda, shaǵyn jáne orta bızneske nesıe berý kólemi de artyp keledi.

«Halyq buryn alyp qoıǵan nesıelerdiń paıyzdyq mólsherlemesi bazalyq mólsherleme kóterilgen kezde kóterilmeıdi. Burynǵy nesıeni jaýyp, jańasyn alsa, sol kezde ǵana kóterilgen paıyzdyq mólsherlememen nesıe rásimdeıdi. Sondyqtan men nesıe alý degen óte jaýapty is bolǵandyqtan óte uqyppen qarap, óz múmkindikterińizdi tarazylap baryp sheshim qabyldaýǵa keńes berer edim. Ázirge biz bazalyq mólsherlemeni aıtarlyqtaı joǵary kótergenimizge qaramastan, nesıelerdiń paıyzdyq mólsherlemesi sol deńgeıde ósip jatpaǵanyn kórip otyrmyz», - dedi Ǵalymjan Pirmatov.

Aıta keteıik, Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde qaldyrý týraly sheshim qabyldady.