Ulttyq bank alǵashqy makroekonomıkalyq saýalnamanyń nátıjelerin jarııalady

NUR-SULTAN. QazAqparat - Makroekonomıkalyq saýalnamany júrgizýdegi maqsat – Ulttyq bank pen naryqtaǵy kásibı qatysýshylardyń arasyndaǵy izgi baılanysty jaqsartý. Sarapshylar qaýymdastyǵymen dıalog ornatý retteýshi men naryq arasyndaǵy aqparattyq asımmetrııany meıilinshe azaıtýǵa baǵyttalyp otyr.

Bul týraly QazAqpart Ulttyq banktiń baspasóz qyzmetine silteme jasap habarlaıdy.

Saýalnamaǵa Qazaqstan boıynsha makroekonomıkalyq kórsetkishterdi taldap, boljaýmen aınalysatyn 11 uıym qatysty. Respondentter qataryna naryqtaǵy kásibı qatysýshylar, zertteý ınstıtýttary, halyqaralyq uıymdar men reıtıngtik agenttikter kirdi. Keleshekte bul tizimniń aıasy keńeıtilýi múmkin.

Makroekonomıkalyq saýalnamada Ulttyq banktiń boljamdary qamtylmaıtynyn atap ótken jón. Onda ishki jáne álemdik naryqtardaǵy jaǵdaıyń keleshek damýyna qatysty naryqtaǵy kásibı qatysýshylardyń táýelsiz pikirine, baǵalaýlary men kútýlerine sholý jasalǵan.

Saýalnamany Ulttyq banktiń boljamdarmen qosa jarııalanatyn bazalyq mólsherleme boıynsha sheshimder aldynda jylyna keminde 4 ret turaqty túrde júrgizý josparlanyp otyr. Onyń nátıjeleri QUB-tyń resmı saıtynda «Ulttyq banktiń makroekonomıkalyq saýalnamasy» bóliminde jarııalanady.

Budan ári respondentterdiń boljamyna negizdelgen derekterdiń jınaqtalýyna qaraı jarııalanymdaǵy aqparat tolyqtyrylyp otyrady. Aqsha-kredıt saıasaty týraly baıandama jarııalanǵannan keıin alǵysharttar men boljamdardy talqylaý úshin saýalnamaǵa qatysýshylarmen kezdesý ótkizý josparda bar.

Saýalnama nátıjelerin myna jerden kórýge bolady.