Ulttyq bank «7-20-25» baǵdarlamasyn iske asyrý belsendiligin ulǵaıtty

ASTANA. QazAqparat - QR Ulttyq banki Qazaqstan Prezıdentiniń Joldaýyndaǵy barlyq tapsyrmalardy oryndaıdy. Bul týraly Elbasy Joldaýynan týyndaıtyn tapsyrmalardy oryndaý máseleleri qaralǵan QR Úkimetiniń keńeıtilgen otyrysynda QR Ulttyq banki tóraǵasy Danııar Aqyshev aıtty, dep habarlaıdy QazAqparat tilshisi.

D.Aqyshev baıandamasynda Ulttyq banktiń QR Prezıdentiniń Joldaýynda aıtylǵan barlyq tapsyrmalardy oryndaıtynyna sendirdi.

«Ulttyq bank Memleket basshysynyń barlyq tapsyrmalaryn oryndaıdy jáne baǵanyń turaqtylyǵy men qarjy naryǵyndaǵy turaqtylyqty qamtamasyz etý úshin bar kúsh-jigerin salady. Inflıatsııanyń tómendeýi - bul nesıe boıynsha mólsherlemlerdi tómendetý, halyqtyń naqty tabysyn kóterý jáne ekonomıkadaǵy barlyq shyǵyndardy tómendetý úshin basty faktor. Úkimettiń, Ulttyq bank pen jergilikti atqarýshy organdardyń birlesken jumysy bıyl ınflıatsııany belgilengen maqsatty dálizde ustap turýǵa múmkindik beredi dep sanaımyz», - dedi D.Aqyshev.

Ulttyq bank tóraǵasy baǵanyń ósýine jol bermeý boıynsha josparlanyp otyrǵan sharalar týraly baıandady. Sonymen qatar ol Ulttyq bank «7-20-25» baǵdarlamasyn iske asyrý belsendiligin ulǵaıtyp jatqanyn jetkizdi. Baǵdarlama iske asyryla bastaǵan eki aıdyń ishinde bankter 25 mlrd teńgege nesıelerdi maquldaǵan. Prezıdentke baıandalǵandaı, qazirge deıin azamattardyń 2 myńnan astam ótinimi maquldandy.