Ulttyq aldyn alý tetiginiń toptary arnaıy mekemedegi qamaýǵa alynǵandarǵa baryp qaıtty

NUR-SULTAN. QazAqparat - Ulttyq aldyn alý tetiginiń aımaqtyq toptary sherýge qatysqan adamdardyń zańdy quqyqtarynyń saqtalýy boıynsha júrgizilgen monıtorıng nátıjelerin Bas prokýratýraǵa jiberdi, dep habarlaıdy QazAqparat QR Adam quqyqtary jónindegi ýákildiń baspasóz qyzmetine silteme jasap.

Qazaqstandaǵy Adam quqyqtary jónindegi ýákildiń sheshimi boıynsha Nur-Sultan, Almaty qalalary, Aqmola, Qaraǵandy, Almaty oblystarynyń ulttyq aldyn alý tetiginiń (UAT) aımaqtyq toptary taıaýda ótken mıtıngiler barysynda ustalǵan azamattardy olardyń zańdy quqyqtarynyń saqtalýyna monıtorıng júrgizý maqsatynda ustaý oryndaryna jiberilgen.

«Aımaqtyq toptar 20 arnaıy mekemede boldy, onda Nur-sultan jáne Almaty qalalaryndaǵy mıtıngterge qatysqany úshin 484 tutqynǵa alynǵan azamattarmen jeke áńgimelesti.

Monıtorıng barysynda atalǵan mekemelerde tutqyndalý jaǵdaılary men ákimshiliktiń is-áreketteri týraly jalpy shaǵymdar túspegen. Ustaý oryndarynda jetkilikti dárejede azyq-túlik, medıtsınalyq jáne ózge de kómek qamtamasyz etilgen», delingen habarlamada.

Ýákildiń baspasóz qyzmetiniń málimetinshe, áńgimelesýler kezinde jeke azamattar ózderiniń quqyqtaryn buzý týraly, atap aıtqanda qamaýda ustaýdyń negizdiligine, polıtsııa bólimderinde bolý uzaqtyǵyna jáne ýaqytsha oqshaýlaý oryndaryna jetkizilýine, sondaı-aq zań kómegine qol jetkizýdiń shektelýine qatysty shaǵymdandy.

«UAT aımaqtyq toptarymen júrgizilgen jumys ustalǵan adamdardyń ornalasqan jeri týraly týystaryn aqparattandyrýdy jedeldetýge yqpal etkenin atap ótken jón. Monıtorıng nátıjeleri Memleket basshysynyń bergen tapsyrmasyna sáıkes azamattardyń zańdy quqyqtaryn qamtamasyz etý jóninde belgilengen tártipte sharalar qabyldaý úshin Bas prokýratýraǵa jiberildi», delingen habarlamada.

Eske sala ketsek, Qazaqstan Prezıdenti Qasym-Jomart Toqaev Bas prokýror Ǵızat Nurdáýletovti qabyldap, ustalǵan tulǵalardyń naqty sany men olardyń kinálarynyń deńgeıin anyqtady tapsyrǵan bolatyn.