Ulttyq vagon parki 700 zamanaýı vagonmen tolyǵady

<p>ASTANA. KAZINFORM &ndash; 2030 jylǵa qaraı elimizde zamanaýı ári yńǵaıly poıyzdardyń sany arta túspek. Tolyǵyraq &laquo;Jolaýshylar tasymaly&raquo; AQ basqarma tóraǵasy Jánibek Taıjanov aıtyp berdi.</p>

«Jyl saıyn orta eseppen 13,5 mln jolaýshy poıyzben qatynaıdy. Ásirese jolaýshylar arasynda Astana-Almaty, Astana-Shymkent, Almaty-Shymkent, Astana-Semeı jáne Almaty-Semeı baǵyttary suranysqa ıe. 2030 jylǵa qaraı ulttyq vagon parkin 700 vagonmen tolyqtyrý josparda bar. Búginde elimiz boıynsha 138 poıyz baǵyty bar, sonyń ishinde 97 baǵyt boıynsha biz jaýaptymyz. Sońǵy 10 jylda bizdiń kompanııa 1,5 myńǵa jýyq zamanaýı vagon satyp aldy», - dedi Jánibek Taıjanov vedomstvoda ótken baspasóz máslıhatynda.

Onyń aıtýynsha, byltyr jáne jyl bastalǵaly kompanııa 150-den astam vagon satyp alǵan.

«Jańa vagondar tirkelgen poıyzdar Almaty-Mańǵystaý, Almaty-Atyraý, Atyraý-Astana, Atyraý-Mańǵystaý, Astana-Shymkent, Astana-Semeı, Qyzylorda-Semeı, Almaty-Jezqazǵan, Pavlodar-Almaty, Pavlodar-Túrkistan jáne Atyraý-Aqtóbe baǵyttary boıynsha qatynaıdy», - deıdi ol.

Buǵan deıin habarlaǵanymyzdaı endi Astanadan Alakólge tikeleı poıyz júredi.

Aıta keteıik, elimizde áıelderge arnalǵan poıyzdar sany artady.