Ulttyq úzdiksiz ınklıýzıvti bilim berý ortalyǵy qurylady – Ǵanı Beısembaev

<p>ASTANA. KAZINFORM &ndash; Oqý-aǵartý mınıstri Ǵanı Beısembaev Senat janyndaǵy &laquo;Taldaý mektebi&raquo; qoǵamdyq jobasynyń qatysýshylarymen kezdesip, ınklıýzııa jáne arnaıy bilim berý máselesin sarapqa saldy.</p>

Vedomstvo basshysynyń málimetinshe, ótken jyly elimizde erekshe bilim berýdi qajet etetin balalardyń sany 230 myńnan asty. Inklıýzııalyq bilim berýdiń qajettiligi men mańyzdylyǵyn eskere otyryp, mınıstrliktiń qurylymynda ınklıýzıvti jáne arnaıy bilim berý departamenti quryldy.

Ótken jyly ǵylymı qaýymdastyq jáne úkimettik emes uıymdarmen birlesip biraz jumys isteldi. Inklıýzııalyq jáne arnaıy bilim berý salasyndaǵy barlyq normatıvtik qujatqa taldaý júrgizilip, nátıjesinde 15 normatıvti-quqyqtyq akt qabyldandy. Osyǵan oraı balanyń dúnıege kelgen sátinen bastap oqý oqyp, mamandyq alǵan kezine deıin psıhologııalyq-pedagogıkalyq súıemeldeýdiń úsh deńgeıli úlgisi engizildi. Qoldaý kabınetteri úshin jańa talaptar bekitildi. Erekshe bilim berýdi qajet etetin balalarmen jumys úshin jeke baǵdarlamalar ázirlendi. Odan bólek pedagog-assıstent, arnaıy pedagog, jeke kómekshi sekildi jańa laýazymdar paıda boldy.

- Ulttyq úzdiksiz ınklıýzıvti bilim berý ortalyǵyn qurý týraly sheshim qabyldandy. Onyń maqsaty pedagogterge ádistemelik súıemeldeý kórsetý, bilim berýdegi qıyndyqtardy anyqtaý jáne aldyn alý boıynsha ǵylymı zertteýler júrgizý, sondaı-aq psıhologııalyq-pedagogıkalyq súıemeldeý qyzmetin úılestirý jumystaryn júzege asyrý, - dedi Ǵanı Beısembaev kezdesý barysynda.

Mınıstrdiń aıtýynsha, ásirese balalardyń áleýmettik beıimdelýine erekshe kóńil bólinip jatyr.

- Dál osy maqsatta Almaty qalasyndaǵy Arnaıy jáne ınklıýzıvti bilim berý ortalyǵyn transformatsııalaý qolǵa alynyp jatyr. Mańyzdylyǵyna basa nazar aýdarar taǵy bir jańalyq — byltyrdan bastap tehnıkalyq jáne kásiptik bilim uıymdarynda múmkindigi shekteýli balalar úshin kvota sany ósti. Onymen qosa «Erekshe bilim berý qajettilikteri bar balalarǵa keshendi qoldaý kórsetý týraly» jańa zań jobasy ázirlenip jatyr, - deıdi ol.

Sondaı-aq, Ǵanı Beısembaev bilim berý uıymdarynda jaıly orta qalyptastyrý barlyq bilim alýshy úshin teń múmkindikterdi qamtamasyz etetin negizgi faktor ekenin aıtty.

Eske sala keteıik, byltyrdan bastap ınklıýzıvti bilim berýde psıhologııalyq-pedagogıkalyq qoldaýdyń úsh deńgeıli modeli engizildi.