«Ulttyq sezim» jobasy trendke aınaldy
2023 jyldyń jeltoqsan aıynan bastap Qazaqstan aýmaǵynda ulttyq kıimniń sán-saltanatyna arnalyp, qazaq mádenıetin nasıhattaýdy maqsat etken «Ulttyq sezim» jobasy jalǵasyp jatyr. Alǵashynda fleshmob retinde qolǵa alynǵan jańashyldyq búginde úlken jobaǵa aınaldy.
— Bastama mádenı baılyq pen dástúrge basa nazar aýdara otyryp, ulttyq birlikti nyǵaıtýǵa baǵyttalǵan. Kóp saıahattap, basqa elderdiń mádenıeti men dástúrlerin tamashalap, sol memleketterdiń turǵyndary tarıhı muralaryn erekshe qurmetteıtinine tań qaldym! Ásirese, Taıland pen Japonııa turǵyndary ózderiniń ulttyq kıimderin maqtanyshpen baıqadym. Ulttyq kıim arqyly ádet-ǵuryp, salt-dástúr, tarıhqa degen qurmetti ańǵardym. Bizdiń tarıhı jáne mádenı muramyzdy saqtaý ulttyq biregeılikti qalyptastyrýda mańyzdy ról atqaratynyna senimdimin. Bizdiń maqsatymyz — dástúrdi saqtap qana qoımaı, barsha qazaqstandyqtardy óz tarıhy men mádenıetin maqtan tutýǵa shabyttandyrý, - deıdi «Ulttyq sezim» jobasynyń bastamashysy Qanat Kópbaev agenttik tilshisine bergen jaýabynda.
Joba eń alǵash qolǵa alynǵan ýaqytta elimizdiń jetekshi uıymdarynyń 7 200-den astam qyzmetkeri qoldaý kórsetken.
Olardyń qatarynda Kusto Group, Tas Group, Chocofamily Holding, BI Group, Astana Group, Invictus, Novopack, Bilim Media Group, Ordamed Group, MYD Production, SDC, Freedom Holding Corp, Ulttyq sport túrleri qaýymdastyqtary men federatsııalar bar.
— Búginde jobany Qazaqstannyń 100-den astam kompanııa men bilim berý uıymy barynsha qoldap jatyr. Jalpy qatysýshylar sany 20000 adamnan asty. Qýantarlyǵy, qoldaýshylardyń sany kún saıyn artyp keledi. Tek Naýryz meıramynda ǵana emes, jyldyń kez kelgen kúninde ulttyq kıimdi kıip júrý sánge aınalyp barady. Memleket basshysy Ulttyq quryltaıdyń úshinshi otyrysynda ulttyq bolmysymyzdy nyǵaıtý eń mańyzdy mindet ekenin atap kórsetti: «Keıbir iri kompanııalar, oqý oryndary ulttyq naqyshtaǵy kıimderdi kııý tájirıbesin qazirdiń ózinde engizip jatyr. Bul — durys bastama». Bizdiń kúsh-jigerimizdi Prezıdenttiń atap ótkenine qýanyshtymyz, - deıdi joba jetekshisi Oksana Shkrygýnova.