Ulttyq parkterge baılanysty zańnamalyq ózgeris: Mekeme basshylary ne deıdi

<p>ALMATY. KAZINFORM &ndash; Bıyl 8 shildede Memleket basshysy &laquo;QR keıbir zańnamalyq aktilerine erekshe qorǵalatyn tabıǵı aýmaqtar jáne elektr energetıkasy máseleleri boıynsha ózgerister men tolyqtyrýlar engizý týraly&raquo; zańǵa qol qoıdy. Bul ózgeristerge baılanysty Almaty oblysynyń aýmaǵynda Ulttyq tabıǵı parkterdiń basshylary pikir bildirdi.</p>

«Eń birinshi, Erekshe qorǵalatyn tabıǵı aýmaqtardy paıdalanǵany úshin 0,1 paıyz salyq tólemderi memlekettiń qoryna aýdarylatyn, ol alynyp tastaldy. Ekinshiden, kólik quraldarynan alynatyn salyq ta alynyp tastaldy. Qazirgi tańda tólem tek qana Ultttyq parktiń arnaıy esepshotyna túsedi. Árbir park óziniń jer jaǵdaıyn qaraı óziniń tarıfterin usyndy. Búgingi kúni Kólsaı kólderine alynatyn tarıf – árbir azamattan 500 teńge», - dedi Kólsaı kólderi ulttyq parki dırektorynyń orynbasary Hamıt Ahmetov.

Sondaı-aq ol zańnamadaǵy ózgerister ulttyq parkke qalaı áser etýi múmkin ekenin atap ótti.

«Jańa ózgeris týrıstik kompanııalarǵa oń áserin tıgizedi. Sondaı-aq baqylaý-ótkizý tospasynan ótkizý máselesi de jeńildeıdi. Sebebi bolashaqta elektr jelisi júrip, ınternet paıda bolǵan kezde tólem tek qana elektrondy formatta bolady. Sonda jemqorlyq bolmaıdy. Ekinshi jaǵy, bul ekobeketterde úlken kezekte turǵan kólikterdiń sanyn azaıtýǵa áserin tıgizedi», - dedi Hamıt Ahmetov.

Aıta ketken jón, Kólsaı kólderine byltyr 244 myńnan astam týrıst barsa, bıyl 7 aıda 233 myńnan astam adam sapar shekken. Jańa zańǵa baılanysty Sharyn memlekettik ulttyq parkiniń dırektory Gúlmıra Nysanbaeva da pikir bildirdi.

«Tabıǵı aýmaqtardy paıdalanǵany úshin kórsetiletin qyzmetterdiń tólemi birden ulttyq parkterdiń arnaıy shotynda qalatyndyǵy ulttyq parkterdiń qyzmeti úshin ońtaıly sheshim, oń ózgerister alyp keledi. Bul ózgerister qabyldanǵanǵa deıin qarjy qarajaty Respýblıkalyq bıýdjetke túsetin, bıýdjetten ulttyq parkterge tek belgili mólsheri ǵana bólinetin. Qazirgi tańda atalmysh qyzmetten túsken túsimder tikeleı parktiń týrıstik áleýetin arttyrýǵa, materıaldyq-tehnıkalyq bazasyn nyǵaıtýǵa, tabıǵatty qorǵaý is-sharalaryn júrgizýge, týrıstik marshrýttardy abattandyrý, ınfraqurylymdardy damytý, kelýshi týrısterge sapaly qyzmetter usynyp, qyzmet sapasyn kóterýge, aýmaqtyń tazalyq jumystaryn júrgizýge, sondaı-aq ekologııalyq aǵartýshylyq is-sharalaryn júrgizýge jumsalady. Bul sheshim - park jumysyn nyǵaıtyp, ulttyq parkterdiń kórkeıýine oń áserin tıgizetini anyq», - dedi ol.

Al Jońǵar Alataýy memlekettik ulttyq tabıǵı parkiniń bas dırektory Marat Qabıev atalǵan ózgeristerge baılanysty tabıǵı parkti damytý boıynsha birqatar josparlardy oryndaýǵa múmkin paıda bolatynyn aıtty.

«Byltyr kelýshiler sany 3 myń adamnan asty. Bıyl eki ese kóbeıip 5 myńǵa jaqyndap qaldy. Buryn Erekshe qorǵalatyn tabıǵı aýmaqtardy paıdalanǵany úshin alynatyn tólem bıýdjetke ketetin. Men Ulttyq parkte jumys istegeli 5-6 jyl boldy. Búginge deıin osy bıýdjetke ketken qarajattan jol jóndeý jáne ózge de máselelerge kómek bola bermeıtin. Endi túsimder parkterge berilse jáne tarıf quny kóterilse, biz jumysqa belsene kirisemiz. Parkte jumys isteıtin 10 shaqty adam bar. Olar jalaqysyn bıýjetten alady. Al biraq jumys barysyndaǵy shyǵyndaryn ózderi tóleıtin. Endi qarajat ózimizge berilse, bul máseleni de qarastyramyz», - dedi Ulttyq park basshysy.

Sondaı-aq Marat Qabıev ulttyq park aýmaǵyndaǵy basty máselelerge toqtaldy.

«Taýda abattandyrý jumystaryn júrgizý de ońaı emes. Kamera qoıý, aqsha túsimin de zamanaýı quraldarmen jasaıtyndaı ózgertý kerek. Onyń bári túsken qarajatqa baılanysty. Qarajat kóbeıse, týrızmdi damytý boıynsha josparymyz bar. Jaqyn aýyl-aımaqtaǵy týrızm salasyna tartsaq deımiz. Taý týrızmindegi eń úlken másele - jol. Bizde 14 marshrýt bar. Onyń jalpy kólemi 1 myń shaqyrymnan asady. Eń uzyn marshrýtymyz 35-40 shaqyrym bolady. Ondaı marshrýttarǵa ózimizdiń kólik pen jylqylar qajet», - dep atap ótti ol.

Eske salaıyq, buǵan deıin Qazaqstanda ulttyq parkterge kirý tarıfi nelikten ártúrli ekenin jazǵanbyz.